Սկսվել է ՀԱՊԿ խաղաղապահների պահպանած սոցիալապես նշանակալի օբյեկտների հանձնումը Ղազախստանի իրավապահ մարմիններին։ Այս մասին հինգշաբթի լրագրողներին ասել են ՌԴ պաշտպանության նախարարությունում։
«ՀԱՊԿ հավաքական խաղաղապահ ուժերի հրամանատարության եւ Ղազախստանի Հանրապետության պաշտպանության նախարարության մշակած պլանի համապատասխան՝ սկսվել է խաղաղապահների պահպանած սոցիալապես նշանակալի օբյեկտների հանձնումը երկրի իրավապահ մարմիններին»,- ասել են ռազմական գերատեսչությունում։
Այնտեղ նաեւ նշել են, որ ստորաբաժանումները սկսել են պատրաստել տեխնիկան եւ նյութական միջոցները՝ Ռուսաստանի ՕՏՈւ ինքնաթիռներ բարձելու համար։
ՀԱՊԿ հավաքական խաղաղապահ ուժերի ստորաբաժանումները, որոնք կատարել են առաջադրանքը, պատրաստվում են վերադառնալ մշտական տեղակայման վայրեր։ «ՀԱՊԿ խաղաղապահների վերադարձն իրենց երկրներ կկազմակերպվի ղազախական կողմի հետ փոխգործակցությամբ»,- նշել են ՌԴ պաշտպանության նախարարությունում։
Հունվարի 2-ին Ղազախստանի մի շարք քաղաքներում բողոքի ցույցեր տեղի ունեցան, որոնք մի քանի օր հետո վերածվեցին զանգվածային անկարգությունների եւ ջարդարարությունների։ Դրանք ուղեկցվում էին ոստիկանների, զինվորականների եւ իշխանության մարմինների վրա հարձակումներով երկրի շատ քաղաքներում, առաջին հերթին Ալմաթիում։ Տուժեցին հազարավոր մարդիկ, զոհվածների ստույգ թիվը հայտնի չէ։ Նախագահ Կասիմ-Ժոմարտ Տոկաեւի դիմումից հետո ՀԱՊԿ երկրները խաղաղապահներ ուղարկեցին հանրապետություն։ Իշխանությունների տվյալներով՝ սահմանադրական կարգը վերականգնվել է բոլոր շրջաններում։
