ՀԱՊԿ հավաքական խաղաղապահ ուժերը, պլանի համաձայն, դուրս կբերվեն Ղազախստանից մինչեւ հունվարի 19-ը ներառյալ։ Այս մասին հինգշաբթի ՌԴ նախագահ Վլադիմիր Պուտինին հայտնել է ՌԴ պաշտպանության նախարար, բանակի գեներալ Սերգեյ Շոյգուն, փոխանցում է ՏԱՍՍ-ը։

«Վաղը 14 ինքնաթիռով դուրս ենք բերում բոլոր ուժերը մեր գործընկերներ Հայաստանից, Տաջիկստանից, Բելառուսից, Ղրղզստանից՝ հաշվի առնելով, որ դրանք մոտակայքում են, ապա հինգ օրվա ընթացքում դուրսբերումը կիրականացվի մնացած խաղաղապահ ուժերի օբյեկտների փոխանցմանը զուգահեռ: Մենք նախատեսում ենք ամբողջ աշխատանքն ավարտել 19-ին»,- ասել է Շոյգուն։

Ռուս նախարարի խոսքով՝ Ղազախստանում ՀԱՊԿ խաղաղապահները պաշտպանության տակ են առել առանձնահատուկ նշանակություն ունեցող 14 օբյեկտ։

ՀԱՊԿ խաղաղապահների մուտքը Ղազախստան թույլ տվեց հանրապետության անվտանգության ուժային կառույցների մոտ 1.6 հազար աշխատակցի ազատել ավազակների դեմ պայքարելու համար, զեկուցել է Շոյգուն։ «Հայաստանը, որպես նախագահող [երկիր], բնականաբար, պետք է գլխավոր դերակատարում ունենար բոլոր փաստաթղթային որոշումների նախապատրաստման մեջ, այսպես կոչենք։ Այդ ամենն արվել է։ Օպերացիայի այս տեմպերի շնորհիվ առաջին օրերին հնարավոր եղավ ազատել Ղազախստանի անվտանգության կառույցների շուրջ 1.6 հազար աշխատակցի, ովքեր ակտիվորեն ներգրավվեցին այդ քաոսը հանրապետություն բերած ավազակների դեմ պայքարում»,- ասել է նախարարը։