Ալիեւը լավ գիտի, որ ղարաբաղյան հակամարտությունը չի լուծվել, իսկ ՌԴ արտգործնախարար Լավրովի վերջին հայտարարությունը նրա համար ապտակ էր։ Այս մասին հունվարի 17-ին լրագրողների հետ զրույցում ասաց Հայաստանի Հանրապետական կուսակցության խոսնակ Էդուարդ Շարմազանովը։
Նա հիշեցրեց, որ ավելի վաղ նույնն ասել է ՌԴ նախագահ Վլադիմիր Պուտինը։ Այդ հարցը, նրա խոսքով, պետք է լուծվի Մադրիդյան սկզբունքների եւ Կազանի փաստաթղթի շրջանակում, որոնցում ժողովուրդների ինքնորոշման իրավունքի պահպանումը պարտադիր է։ «Ալիեւն ակնհայտորեն հասկանում է, որ ժամանակն իր օգտին չի աշխատում, եւ նա կարող է ապագայում չունենալ նման նվեր՝ Հայաստանի գործող իշխանությունների տեսքով։ Այս առումով նա շտապում է ու փորձում ստանալ առավելագույնը, եւ գուցե այն, ինչ իրեն խոստացել էր կապիտուլյանտ ռեժիմը։ Որքան շատ զիջումներ ստանա Ադրբեջանը, այնքան ավելի շատ կպահանջի։ Ալիեւն ու Նիկոլ Փաշինյանը, ըստ էության, նույն բանն են անում։ Ավելին, Ալիեւն ինքն է ասել, որ ինքը կանգնած է Հայաստանում 2018 թվականի գործընթացների հետեւում։ Հայաստանի զինված ուժերի գլխավոր շտաբի հայտարարությունն անվանել է ռազմական հեղաշրջման փորձ ընդամենը 3 մարդ՝ Էրդողանը, Ալիեւը եւ Փաշինյանը»,-ասաց նա։
Շարմազանովը պարզաբանեց, որ Ալիեւի լկտի պահվածքի պատճառն այն է, որ Հայաստանը փաստացի գոյություն չունի, չի կարողանում պահպանել իր ինքնիշխանությունը եւ հակաքայլեր ձեռնարկել թուրք-ադրբեջանական տանդեմի գործողությունների դեմ։
Երկրորդ պատճառը, նրա խոսքով, աշխարհաքաղաքական գործոնն է՝ կապված նրա հետ, որ ԽՍՀՄ-ի փլուզումից հետո Ռուսաստանի եւ Արեւմուտքի հարաբերությունները գտնվում են լարվածության գագաթնակետում։ «Ալիեւը փորձում է օգտվել այն հանգամանքից, որ մեր դաշնակիցը եւ Անդրկովկասում ամենաազդեցիկ ուժը զբաղված է այլ ուղղությամբ խնդիրներով, եւ փորձում է առավելագույնը ստանալ կապիտուլյանտի խոստացածից։ Հայաստանը պետք է գիտակցի, որ այս տարածաշրջանում Ռուսաստանն ու Թուրքիան՝ չնայած համագործակցությանը, հակառակորդներ են։ Այսօր ընթանում է ազդեցության ոլորտների բաշխում․ Ռուսաստանը ցանկանում է հասնել «Յալթա-2»-ին եւ հաստատել իր հեգեմոնիան հետխորհրդային տարածքում։ Ալիեւը Ուկրաինա կատարած այցով բարձրացրել է խաղադրույքները եւ մի փոքր շանտաժի դիմել»,-եզրափակեց ՀՀԿ ներկայացուցիչը։
