Նուրսուլթան Նազարբաեւի դուստրը՝ Դինարա Կուլիբաեւան, 62 մլն ֆրանկով (մոտ 63 մլն դոլար) գնել է Chateau Bellerive դղյակը Շվեյցարիայում, Ժնեւի լճի ափին, տեղեկացրել է Bilan շվեյցարական ամսագիրը։
Դղյակն ունի հետաքրքիր պատմություն։ XVII դարակեսին այն սկսել է կառուցել Սավոյայի հերցոգ Կառլ Էմանուիլ II-ը՝ ի պատասխան Ժնեւի կողմից աղի հարկի ավելացման, որը տեղափոխում էին լճով, տեղեկացնում է Business FM-ը։ Հերցոգը աղը պահելու շտեմարան է կառուցում, բայց, ըստ էության, դա ամրոց էր, իսկ Ժնեւի իշխանություններն այն ժամանակ արգելում էին ամրոցներ կառուցել Ժնեւի մոտ։
Այդ պատճառով բազմամյա կոնֆլիկտ է առաջանում Սավոյայի եւ Ժնեւի միջեւ։ Հերցոգի մահվանից հետո ժառանգները գնում են զիջումների եւ պարզեցնում են նախագիծը։ Մասնավորապես, վեց աշտարակից թողնում են երկուսը, եւ կառույցը կորցնում է ամրոցի տեսքը։
Ինչպես պատմել է Շվեյցարիայում «Наша газета»-ի գլխավոր խմբագիր Նադեժդա Սիկորսկայան, դղյակը գտնվում է ամենահեղինակավոր վայրերից մեկում՝ Կոլոնժ-Բելրիվ կոմունայում, Ժնեւի լճի ափին։ Այն ներառված է Շվեյցարիայի ազգային ժառանգության ցուցակում՝ որպես մշակույթի հուշարձան։ Մոտավորապես XIX դարից դղյակը մասնավոր սեփականություն է եղել։ Մինչեւ վերջերս այն պատկանում էր արքայազն Սադրուդդին Աղա-խանի ժառանգներին, որը երկար ժամանակ եղել է ՄԱԿ փախստականների գծով գերագույն հանձնակատարաը եւ ապրել է Ժնեւում։
«Դղյակը վաճառքի է հանվել դեռեւս երեք տարի առաջ, եւ տերերը հույս ունեին 120 մլն ֆրանկ ստանալ դրա համար։ Այսինքն՝ կարելի է ասել, որ Դինարա Կուլիբաեւան շահավետ գնում է կատարել՝ ընդամենը 62 մլն-ով։ Իսկ ընդհանրապես, Դինարա Կուլիբաեւան Ժնեւում հաստատվել է դեռեւս 2011թ., այն բանից հետո, երբ մեկ տարի դրանից առաջ ձեռք էր բերել այն ժամանակների համար ամենաթանկ վիլլան մեր քաղաքում, գործարար Ռուստամ Ակսյոնենկոյից, 74,7 մլն ֆրանկով։ Խոսքն այն ժամանակ շքեղ վիլլայի մասին էր, նույնպես լճի ափին, Անյեր կոմունայում, զբաղեցնում է 8 հազար քառակուսի մետր տարածք։ Այդ ժամանակվանից Դինարա Կուլիբաեւան մշտապես Շվեյցարիայի ամենահարուստ մարդկանց վարկանիշային ցուցակում է, որն ամեն տարի դեկտեմբերին հրապարակում է Bilan տնտեսական ամսագիրը։ Վերջին անգամ մեր գործընկերները նրա ունեցվածքը գնահատել են 1,5 մլրդ ֆրանկ»,- ասել է նա։
Հիշեցնենք, որ The Sunday Telegraph-ը տեղեկացրել էր, որ Ղազախստանի նախկին նախագահ Նուրսուլթան Նազարբաեւի կրտսեր դուստր Ալիան դեռեւս 2006թ. ձեռք էր բերել առանձնատուն Լոնդոնի հյուսիսում՝ մտադրվելով ստանալ բրիտանական քաղաքացիություն։
