Տիրապետում եմ այն տեղեկատվությանը, թե ինչ առաջարկություններով է հայկական կողմը հանդես եկել սահմանազատման եւ սահմանագծման հանձնաժողովի աշխատանքի հետ կապված, որոնց մասին խոսել է Ռուսաստանի ԱԳՆ ղեկավար Սերգեյ Լավրովը։ Այս մասին լրագրողների հետ զրույցում հունվարի 18-ին ասաց կառավարող «Քաղաքացիական պայմանագիր» խմբակցությունից խորհրդարանի փոխնախագահ, հայ-թուրքական բանակցություններում Հայաստանի հատուկ ներկայացուցիչ Ռուբեն Ռուբինյանը։
Նա պարզաբանեց, որ ծանոթ է այդ առաջարկներին։ Նրա խոսքով՝ պատկերացումները տեղավորվում են այն տրամաբանության մեջ, որի մասին Հայաստանը հրապարակայնորեն հայտարարել է։ «Այս հարցով խնդրում եմ դիմել ԱԳՆ կամ կառավարություն»,- նշեց Ռուբինյանը։
Նա կոչ արեց չօգտագորխել «Զանգեզուրի միջանցք» տերմինը, քանի որ, նախ՝ Հայաստանում չկա վարչատարածքային միավոր Զանգեզուր անվամբ (չնայած Զանգեզուրը հայերեն բառ է – խմբ.), այլ կա Սյունիքի մարզ, երկրորդ՝ ոչ մի տեղ նշված չէ, որ Հայաստանը պետք է միջանցք տրամադրի էքստերիտորիալ իմաստով։
Փոխխոսնակը հիշեցրեց, որ 2020թ. նոյեմբերի 9-ի հայտարարությունում «միջանցք» տերմինն օգտագործվում է միայն մեկ անգամ, Լաչինի միջանցքի դեպքում։
«Դա պարզապես ճանապարհ չէ, այլ տարածք՝ ռուս խաղաղապահների վերահսկողության տակ։ Սյունիքի դեպքում խոսվում է հաղորդակցության մասին, որը հնարավոր է ճանապարհների հանդեպ ինքնիշխանության պահպանման դեպքում»,- հավաստիացրեց նա։
Հիշեցնենք, որ հունվարի 14-ին Ռուսաստանի արտաքին գործերի նախարար Սերգեյ Լավրովը մամուլի ասուլիսում հայտարարել էր, որ սահմանագծման հանձնաժողովի աշխատանքի վերաբերյալ հայկական կողմը նոր առաջարկներ ունի, որոնք Մոսկվան կփոխանցի Բաքվին։
