Ղազախստանի Հանրապետության նախկին նախագահ Նուրսուլթան Նազարբաեւը դիմել է քաղաքացիներին, տեսանյութը հրապարակվել է նրա յութուբյան պաշտոնական ալիքում։
«Հարգելի ղազախստանցիներ: Սիրելի հայրենակիցներ: Հունվարյան իրադարձությունները ցնցեցին ամբողջ Ղազախստանը։ Այս անկարգությունների եւ Ղազախստանի վրա կազմակերպված հարձակումների նպատակը երկրի ամբողջականության եւ պետության հիմքերի ոչնչացումն էր։ Այդ իրադարձությունները եւս մեկ անգամ ցույց են տալիս, որ անկախությունը պետք է փայփայել աչքի լույսի պես, առանձնահատուկ խնամք պահանջող փխրուն ամանի պես:
Տեղի ունեցած ողբերգությունը դաս էր բոլորիս համար։ Կարեւոր է պարզել, թե ով է կազմակերպել այդ բոլոր ջարդերն ու սպանությունները։ Այս հարցին պատասխան կտա հետաքննությունը»,- ասել է Նուրսուլթան Նազարբաեւը։
Երկրի առաջին նախագահը ցավակցություն է հայտնել զոհվածների ընտանիքներին ու մտերիմներին, ինչպես նաեւ ապաքինում է մաղթել տուժածներին։
«Արձագանքելով ինձ ուղղված բազմաթիվ դիմումներին եւ ԶԼՄ-ներում հրապարակումների հետ կապված՝ հայտնում եմ, որ 2019 թվականին նախագահի լիազորությունները փոխանցել եմ Կասիմ-Ժոմարտ Տոկաեւին եւ այդ ժամանակվանից թոշակառու եմ, իսկ այժմ գտնվում եմ արժանի հանգստի մեջ մայրաքաղաք Ղազախստանում եւ ոչ մի տեղ չեմ մեկնել:
Նախագահ Կասիմ-Ժոմարտ Տոկաեւն ամբողջական իշխանություն ունի: Նա Անվտանգության խորհրդի նախագահն է։ Շուտով նախագահը կընտրվի Նուր Nur Otan կուսակցության նախագահ։ Ուստի վերնախավում կոնֆլիկտ կամ առճակատում չկա։ Այս թեմայով ասեկոսեները բացարձակապես անհիմն են»,- հավելել է նա։
