Հնդկաստանում կարող են խստացնել ավտոմեքենաների անվտանգության պահանջները։ Պլանավորվում է, որ տեղական շուկայում վաճառվող բոլոր նոր մարդատար ավտոմեքենաները, որպես ստանդարտ, հագեցած լինեն առնվազն վեց անվտանգության բարձիկներով, հայտնում է Gazeta-ն։
Ճանապարհային տրանսպորտի եւ մայրուղիների նախարարությունը հավանություն է տվել օրինագծին, ասել է նախարար Նիթին Գադկարին։
Նախաձեռնության համաձայն՝ մեքենաները պետք է հագեցած լինեն երկու դիմային եւ երկու կողային բարձիկներով՝ վարորդի ու առջեւի ուղեւորի համար, ինչպես նաեւ երկու «վարագույրով» սրահի ողջ երկարությամբ։
Ինչպես պարզաբանում է Hindustan Times-ը, նոր պահանջներն ուժի մեջ կմտնեն 2022 թվականի հոկտեմբերի 1-ից։ Հնդկաստանը կլինի առաջին երկիրը, որտեղ պարտադիր կլինի վեց անվտանգության բարձիկների առկայությունը։
Այժմ Հնդկաստանում բոլոր մեքենաների համար պարտադիր է անվտանգության երկու բարձիկը՝ մեկը վարորդի, մյուսը առջեւի ուղեւորի համար: Վարորդի համար բարձիկի կանոնը պարտադիր է դարձել 2019 թվականի հուլիսի 1-ից, իսկ առջեւի ուղեւորի համար՝ 2022 թվականի հունվարի 1-ից։
Ավտոմեքենաների որոշ մոդելներ կարող են լուրջ արդիականացման կարիք ունենալ վեց անվտանգության բարձիկներ տեղադրելու համար, նշում է Autocar India-ն: Սա կարող է զգալիորեն բարձրացնել մեքենաների արժեքը, հատկապես բյուջետային:
Հնդկական ավտոարտադրողների միությունը կասկածի տակ է դրել իշխանությունների այս գաղափարը: Նրա ներկայացուցիչն ասել է, թե տրանսպորտի նախարարությունը շարունակում է ավելի շատ ուշադրություն դարձնել մեքենաների ուղեւորների, քան երկանիվ տրանսպորտի ուղեւորների եւ հետիոտների անվտանգությանը: Նա նշել է, որ Հնդկաստանի բնակչության գրեթե 81%-ն օգտվում է երկանիվ տրանսպորտային միջոցներից, իսկ մեքենաների արժեքի բարձրացման պատճառով էլ ավելի քիչ մարդիկ կկարողանան դրանք գնել։