Ուկրաինայի համար խաղադրույքները չափազանց մեծ են: Այս մասին Բեռլին կատարած այցի ժամանակ հայտարարել է ԱՄՆ պետքարտուղար Էնթոնի Բլինքենը, որտեղ Ուկրաինայի հարցով բանակցություններ է վարել Գերմանիայի, Ֆրանսիայի եւ Մեծ Բրիտանիայի ներկայացուցիչների հետ, փոխանցում է «Ամերիկայի ձայնը»։
Նրա խոսքով՝ «Ռուսաստանը շարունակում է մեծացնել Ուկրաինայի դեմ սպառնալիքը»։ «Եվ այն շարունակում է հարձակվել ՆԱՏՕ-ի՝ պաշտպանական դաշինքի վրա, որը գրեթե մեկ միլիարդ մարդու է պաշտպանում Եվրոպայում եւ Հյուսիսային Ամերիկայում, եւ միջազգային խաղաղության եւ անվտանգության առաջնորդող սկզբունքներին, որոնք մենք բոլորս պաշտպանում ենք... Եթե թույլ տալ Ռուսաստանին անպատիժ խախտել այդ սկզբունքները, դա բոլորիս կվերադարձներ շատ ավելի վտանգավոր եւ անկայուն ժամանակաշրջան,- շարունակեց նա:- Ահա թե ինչու են ԱՄՆ-ն եւ մեր գործընկերները Եվրոպայում այդքան մեծ ուշադրություն դարձնում այն ամենին, ինչ կատարվում է Ուկրաինայում։
Դա ավելին է, քան երկու երկրների հակամարտություն, եւ ավելին, քան Ռուսաստանի եւ ՆԱՏՕ-ի առճակատում։ Սա համաշխարհային հետեւանքներով ճգնաժամ է։ Իսկ դա ամբողջ աշխարհից ուշադրություն ու գործողություն է պահանջում։ Իրականում այս ճգնաժամի էությունն առաջին հերթին զենքի կամ ռազմակայանների մասին չէ,- ասել է նա։ -Խոսքն Ուկրաինայի եւ հետխորհրդային այլ երկրների ինքնիշխանության եւ ինքնորոշման մասին է։ Ըստ էության, բանն այն է, որ Ռուսաստանը չի ընդունում միասնական ու ազատ Եվրոպան այն տեսքով, որն այն ձեռք է բերել սառը պատերազմի ավարտից հետո»։
«Պետք չէ զարմանալ, եթե Ռուսաստանը սադրանք կամ միջադեպ նախաձեռնի, իսկ հետո փորձի դա օգտագործել ռազմական միջամտությունն արդարացնելու համար՝ հուսալով, որ երբ աշխարհը հասկանա այդ հնարքը, շատ ուշ կլինի»,- ասել է Բլինքենը։ «Խոսքը միայն հնարավոր ներխուժման եւ պատերազմի մասին չէ։ Հարցն այն է` արդյո՞ք Ուկրաինան իրավունք ունի որպես ինքնիշխան պետություն գոյություն ունենալ։ Խոսքն այն մասն է` արդյո՞ք Ուկրաինան իրավունք ունի ժողովրդավարական երկիր լինել»։
«Եթե Ռուսաստանը ներխուժի եւ օկուպացնի Ուկրաինան, ի՞նչ կլինի հետո։ Անշուշտ, Ռուսաստանը կակտիվացնի իր հարեւաններին խամաճիկ պետությունների վերածելու, նրանց գործունեությունը վերահսկելու եւ ժողովրդավարական ցանկացած դրսեւորում ճնշելու իր ջանքերը, ասել է Բլինքենը։ «Երբ ինքնիշխանության եւ ինքնորոշման սկզբունքները մի կողմ են դրված, տեղի է ունենում վերադարձ մի աշխարհ, որում ոչնչացվում են այն կանոնները, որոնք մենք միասին ձեւավորել են տասնամյակների ընթացքում»:
Մեկնաբանելով Շվեյցարիայում ՌԴ ԱԳ նախարար Սերգեյ Լավրովի հետ առաջիկա բանակցությունները՝ Բլինքենն ասել է: «Չեմ կարծում, որ դրանք կլուծենք Ժնեւում։ Բայց մենք կարող ենք ամրապնդել մեր փոխըմբռնումը, իսկ դա, Ուկրաինայի սահմաններին ռուսական ռազմական կուտակումների դեէսկալացման հետ միասին, կարող է մեզ հեռացնել այս ճգնաժամից առաջիկա շաբաթների ընթացքում»:
