Այս քառօրյան այսօր կավարտվի, բայց կենսական հարցերի շուրջ մեր քննարկումները հեռու են բավարար լինելուց: Այս մասին, այսօր՝ հունվարի 21-ին, ԱԺ-ում իր ելույթում նշեց «Հայաստան» խմբակցության պատգամավոր Քրիստինե Վարդանյանը՝ հավելելով, որ Հայաստանում այսօր ավելի խորացող անվտանգային ճգնաժամ է, քաղաքացիներն ավելի անպաշտպան են դարձել, իսկ արտագաղթի տեմպերն ավելի են մեծացել:
«Տարվա ընթացքում գազի և էլեկտրաէներգիայի գները թանկանում են և այս ամենի արդյունքում խորանում է բարոյահոգեբանական ճգնաժամը: Իսկ ի՞նչ վիճակ է Ադրբեջանում: Ադրբեջանը չբավարարվելով Արցախում բռնազավթված տարածքներով հայտարարում է Սյունիքի և Երևանի նկատմամբ իր հավակնությունների մասին: Ադրբեջանը հայտարարում է, ոչ մեկ անգամ, պարբերաբար և սրանով ջախջախում է բոլոր հայ անհատների, քաղաքական ուժերի հիմնասյունը, որոնք պնդում էին, որ Արցախում հողերը հանձնելով հնարավոր է խաղաղ ապրել: Ադրբեջանը հայտարարում է, թե Հայաստանի հետ խաղաղության պայմանագրի ստորագրումը դեռևս խաղաղության երաշխիք չէ: Ավելի պարզ ասած, դրանով Բաքուն ասում է՝ ես ձեր դեմ դեռ պատերազմելու եմ, որովհետև բոլոր նպատակներիս դեռ չեմ հասել»,-ասաց Քրիստինե Վարդանյանը:
Նկատելով, որ ստեղծված աշխարհաքաղաքական բարդ իրավիճակում բոլոր երկրների ղեկավարները գիտեն իրենց անելիքները և գծում են սեփական երկրի կարմիր գծերը՝ պատգամավոր շեշտեց, որ այս իրավիճակում Հայաստանը սկսել է Թուրքիայի հետ նոր երկխոսության գործընթաց:
Քրիստինե Վարդանյանի խոսքով՝ Թուրքիայի հետ բանակցությունների սեղանին նստողները բավարարել են Անկարայի նախապայմանները, ինչի մասին է խոսում Հայոց ցեղասպանության մասին չխոսելու փաստը և բարձրաստիճան պաշտոնյաների՝ Արցախ չայցելելը:
Պատգամավորի կարծիքով՝ ներկայում բանակցություններն ընթանում են իր հայտ եկած նոր նախապայմանի՝ Սյունիքի «միջանցքի» շուրջ:
«Ստացվում է, որ հայ-թուրքական բանակցությունների սեղանին կա միայն մեկ օրակարգ և այն թյուրքալեզու ժողովուրդներին ցամաքային կապով իրար կապելու օրակարգն է: Մեզ խոստանում են խաղաղություն, բայց չեն ասում դրա գինը եւ դրանով , իսկ խաղաղության գնզրկում են հասարակությանը, որ ինքը որոշի՝ ցանկանում է այդ գնով խաղաղություն, թե ոչ»,-ընդգեց ՀՅԴ-ական գործիչը:
Ընդդիմադիր պատգամավորը նկատեց, որ այս իրավիճակում Հայաստանում հայտնվում են իշխող ուժի ներկայացուցիչներ, որոնք ողջ ուժով իրականացնում են այդ գործընթացի լոբբինգը:
Քրիստինե Վարդանյանը դիմեց ՔՊ պատգամավոր Խաչատուր Սուքիասյանին. «Պարո՛ն Սուքիասյան, օրինակ դուք գիտե՞ք, թե ինչ է եղել Ստամբուլում, բոլոր այն հարուստների հետ, որոնք հրաժարվում էին հավատալ, որ Թուրքիան պարզապես չի ընդունում իրենց գոյությունը: Կարծեմ նրանք հիմա գերեզմաններ էլ չունեն: Լավ, ի՞նչ անենք, գուցե ամբողջ ազգին կոչ անենք, որ ՍԻԼ ջո՞ւր խմեն, կամ Երևան տոնավաճառից օգտվեն, միայն թե ձեզ խնդրենք, որ Թուրքիային նորից մեր գլխին չբերեք, դուք գոնե, առնվազն, մեզ դեռ չեք ցեղասպանել»:
Ըստ կին պատգամավորի՝ Հայաստանը և Արցախը հիմա դիմագրավում են մերօրյա ֆաշիզմի դրսևորումներին, իսկ այդ իրավիճակում գործող իշխանության վրա հույս դնել չի կարելի:
«Փրկության հույս կա, ամեն ինչ կորած չէ, որովհետև, օրինակ, դուք գիտե՞ք, որ այսօր մեր հայրենիքում ապրում է մի մարդ, ով ամեն օր, ժամը 7-ին իր բնակավայրից նստում է դատարկ «Գազելը», միացնում բոլոր լույսերը, քշում է մեկ ժամ հեռավորության վրա գտնվող մեկ այլ բնակավայր՝ թշնամու կողմից դիտարկվող ճանապարհով, հետո այդ նույն ճանապարհով վերադառնում է և սա նրա համար, որ թշնամուն ցույց տա, որ մեր տարածքում կա շարժ և, որ Հայաստանում մարդիկ շարունակում են բնակվել: Հույս կա՝ որովհետև Տավուշում կան մարդիկ, որոնք իրենց բակում կրակ են անում և հնարավորինս երկար են այդ կրակը պահում, որ թշնամին գյուղը դիտարկելիս տեսնի, որ այնտեղ կյանք կա: Հույս կա, որ Կապան, Սյունիքում ապրող 16 տարեկան աղջիկը, ով մինչև պատերազմը ցանկանում էր տեղափոխվել Երևան, հիմա ասում է,որ Կապանից որևէ տեղ գնալ չի ուզում»,-ասաց «Հայաստան» խմբակցության պատգամավորը և հավելեց. «Հայաստանի համար կռիվն առջևում է»:
