Արմեն Սարգսյանի հրաժարականի դրդապատճառների մասին խոսելը դեռ վաղ է։ Այս մասին, այսօր՝ հունվարի 24-ին, ԱԺ-ում լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Հայկ Մամիջնյանը:
«Բարդ է գնահատական տալ իրական եւ տեքստում արտահայտված դրդապատճառների վերաբերյալ։ Դրանք գուցե նույնական են, գուցե՝ ոչ։ Արմեն Սարգսյանի բերած պատճառաբանությունները, իմ կարծիքով, տրամաբանությունից հեռու են, որովհետեւ պարոն Սարգսյանը, երբ ստանձնում էր պաշտոնը, վստահ եմ, որ Սահմանադրությունը կարդացել էր։ Ուստի նույն երգը երգել 4 տարի շարունակ, 4 տարի խոսել լիազորությունների պակասից… ինքը գիտեր այդ պաշտոնի լիազորությունների մասին։
Այն սուղ լիազորությունները, որոնցից ինքն անդադար բողոքում էր, ինքը այդ սուղն էլ չէր իրականացնում՝ բացահայտ հակասահմանադրական օրենքների նկատմամբ իր վերաբերմունքը, բազմիցս ներքաղաքական այս կամ այն ճգնաժամի վերաբերյալ կրավորական կեցվածքը»,-ասաց Մամիջանյանը:
Նա նաեւ հավելեց. «Այո, ինքը լուսանցքում էր շատ ու շատ գործընթացների ժամանակ, այդ թվում՝ նոյեմբերի 9-ի կապիտուլյացիոն հայտարարության կնքման հետ կապված, ինչպես ինքն էր ասել։ Բայց դրան հակազդելւ որոշակի գործիքակազմ ուներ Արմեն Սարգսյանը: Եթե համարում էր, որ իր կարծիքը չեն լսում, չեն օգտագործում իրամբողջ գործիքակազմը, այս հրաժարականը կարող էր ավելի շուտ տալ, կարող էր կամովին չհրաժարվել որոշակի գործիքակազմի՝ հօգուտ ԱԺ-ի: Այնպես որ նրա պատճառաբանությունները չեն դիմանում որեւէ քննադատության»:
