Խելացի ժամացույցները կարող են սխալ հավաքել տվյալները ճարպակալության եւ մուգ մաշկի պատճառով, հայտնում է The Verge պարբերականը:
Լրագրողները որպես օրինակ նշել են Ֆլորիդայի միջազգային համալսարանի (ԱՄՆ) մասնագետների արդիական գիտական հետազոտությունը։ Դրանում գիտնականները եզրակացրել են, որ մուգ մաշկով եւ ճարպի բարձր մակարդակով մարդկանց մոտ խելացի ժամացույցները կարող են սխալ տեղեկություններ հավաքել. կրելի սարքերի այս թերությունը գլխավոր են անվանել:
Բժիշկները գաջեթների արտադրողներին խորհուրդ են տվել ավելի ճշգրիտ փորձարկել իրենց սարքերը դրանք վաճառքի հանելուց առաջ:
Հետազոտության հեղինակ, դոցենտ Ջեսիկա Ռամելլա-Ռոմանի խոսքով՝ խելացի ժամացույցները բավականին լավ են բավարարում գունատ մաշկ ունեցող եւ օրգանիզմում ճարպի նորմալ մակարդակով մարդկանց պահանջներին: Փորձն իրականացվել է շուկայում հայտնի Apple Watch 5, Fitbit Versa 2 եւ Polar M600 սարքերի միջոցով։ Բոլոր սարքերը հիմնված են ֆոտոպլետիզմոգրաֆիայի՝ սրտի բաբախյունի տվյալների հավաքման ոչ ինվազիվ մեթոդի վրա: Պարզվել է, որ մելանինով հարուստ մաշկը լույսն ավելի վատ է փոխանցում։ Նաեւ գեր մարդկանց մաշկն ավելի քիչ ջուր է պարունակում, ինչը խանգարում է արյան հոսքին։
Երկու դեպքում էլ սարքերի կողմից հավաքված տվյալները կարող են սխալ լինել: Մուգ մաշկի առկայության դեպքում սենսորի սխալը 10 տոկոս է կազմում, օրգանիզմում ճարպի ավելացման դեպքում այն հասնում էր 60 տոկոսի:
«ՄԶԻ-ի մակարդակի ավելացման եւ մաշկի երանգի մգեցմանը զուգահեռ ազդանշանը նվազում էր», - ասել է Ռամելլա-Ռոմանը: Մասնագետի խոսքով՝ ֆիթնես գաջեթներ արտադրողները պետք է իրենց սարքերը փորձարկեն մաշկի մուգ գույն ունեցող մարդկանց օգնությամբ, ինչպես նաեւ ծրագրում ճարպակալում ունեցողների ներառեն: