Շատ հավանական է, որ այս որոշումները վերանայվեն արդեն փետրվարին: Այս մասին ՈՒՆԻԱՆ-ին ասել է Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը՝ մեկնաբանելով երկրից դեսպանատների աշխատակիցների մի մասին հեռացնելու մի շարք պետությունների որոշումը։
«Առաջինը եւ գլխավորը՝ արեւմտյան պետությունների բոլոր դիվանագիտական ներկայացուցչությունները շարունակում են աշխատանքը, եւ պրակտիկ մակարդակում ոչինչ չի փոխվում։ Այդ որոշումները դիտարկում ենք որպես որոշակի ներքաղաքական քննարկումների հետեւանք որոշ երկրներում, որտեղ իշխանությունը չի ցանկանում ակնհայտ ավելորդ քննադատության ենթարկվել դիվանագետների աշխատանքի վտանգավոր նյուանսների համար»,- ասել է նա։
Պոդոլյակը նշել է, որ «եթե ռազմական սպառնալիքի հռետորաբանություն կա, ապա կանխատեսելի է, որ դրա հետեւանքով կարող են նաեւ որոշումներ լինել»։ Միաժամանակ նա ընդգծել է, որ օտարերկրյա պետությունների նման գործողությունները տարհանում չեն, քանի որ դիվանագիտական ներկայացուցչությունների աշխատակիցների մեծ մասը մնում է Ուկրաինայում։ «Շատ հավանական է, որ այդ որոշումները կարող են վերանայվել արդեն փետրվարին»,- հավելել է նախագահի աշխատակազմի ղեկավարի խորհրդականը:
Մինչդեռ Ուկրաինայի արտաքին գործերի նախարարությունը ԱՄՆ դեսպանատան աշխատակիցների տարհանումը համարում է վաղաժամ եւ չափից ավելի զգուշավորության դրսեւորում։
ԱՄՆ Պետդեպարտամենտը թույլատրել է իր աշխատակիցների կամավոր հեռանալը եւ կարգադրել, որ Կիեւում դեսպանատնից ընտանիքների համապատասխան անդամները հեռանան։ Նաեւ՝ Ուկրաինայում գտնվող ԱՄՆ քաղաքացիները պետք է դիտարկեն հեռանալու անհապաղ հնարավորությունը՝ օգտագործելով կոմերցիոն կամ այլ մասնավոր տրանսպորտային միջոցներ:
Հնարավոր ներխուժման պատճառով Ուկրաինայում իրենց դեսպանատան աշխատակիցների մի մասին հետ կանչելու որոշում են կայացրել Մեծ Բրիտանիան, Գերմանիան եւ Ավստրալիան։
