Կենդանաբանական այգու դիմաց բողոքի ակցիան ավարտվեց Երեւանի կենդանաբանական այգու դիմաց այսօր՝ հունվարի 31-ին, բողոքի ակցիան՝ ընդդեմ շարունակվող կենդանիների սպանդի ավարտվեց։
Ակցիայի մասնակիցները տարբեր տարիներին այգում աշխատող մասնագետներն էին, որոնք իրենց դժգոհությունն էին հայտնում այգու տնօրեն Արեւիկ Մկրտչյանի աշխատանքից։
Շահագործման բաժնի աշխատակից Սարգիս Շարամանյանը լրագրողների հետ զրույցում ասաց, որ այգում իր նկատմամբ հոգեբանական ճնշումներ են գործադրվում. «Դա արվում է այն բանի համար, որ ես զզվեմ, դուրս գամ. արհամարհում են ինձ, ինձ հետ չեն համագործակցում։ Երկու ամիս է՝ շահագործման բաժինը պարապուրդի է ենթարկված։ Այս պահին այգում լիքը խնդիրներ կան։ Իրար կողքով անցնում ենք, տնօրենը չի բարեւում։ Մեր բանվորերից մեկն ամսի 3-ին գործի չի եկել, հիվանդ է եղել, 4-ին է եկել, տնօրենի տեղակալն ասել է՝ ինչո՞ւ չես եկել, ասել ա՝ հիվանդ եմ, ասել է՝ դիմումդ գրի, «ս… եղիր»»։
Ակցիայի մասնակիցներն ասացին, որ այս հարցի առնչությամբ դիմել են Երեւանի քաղաքապետարան, սակայն դեռ պատասխան չկա։