Վրաստանի կրթության եւ գիտության նախարարության կրթական եւ գիտական ենթակառուցվածքի զարգացման գործակալությունը Ջավախքում դպրոցի նոր շենք է կառուցում Սպիտակի երկրաշարժի ցնցումներից փլված Ախալքալաքի թիվ 3 վրացալեզու միակ դպրոցի համար:
Ըստ գործակալության, 1988 թվականից մինչ այսօր դպրոցն իր դասընթացները շարունակել է կրթվելու համար ոչ բարենպաստ միջավարում` բնակելի շենքում, որտեղ վրացիների հետ սովորում են նաեւ հայերը:
Դպրոցի նոր մասնաշենքը, որը նախատեսված է 240 աշակերտի համար, հագեցած կլինի նորագույն տեխնիկայով: Դպրոցը կներառի նաեւ լաբորատորիա, գրադարան, համակարգչի սրահ, ինչպես նաեւ մարզասրահ: Դպրոցին կից կգործի «Լեզվի տուն» ուսուցման կենտրոնը, որտեղ Ջավախքի շրջանի էթնիկ փոքրամասնություններին պատկանող դպրոցների տնօրենները, ուսուցչուհիները, դիմորդները եւ այլ հետաքրքրվող անձինք վրացերեն կուսումնասիրեն առավել խորացված կերպով:
