ԱԺ ընդդիմությունը՝ ի դեմս «Հայաստան» եւ «Պատիվ ունեմ» խմբակցությունների, մարտի 2-ի նիստում բոյկոտեց ՀՀ նոր նախագահի ընտրության հարցի քննարկումը։ Ընդդիմադիր պատգամավորները լքեցին նիստերի դահլիճը՝ այդպիսով արտահայտելով իրենց վերաբերմունքը տեղի ունեցողի հանդեպ։
«Քաղաքացիական պայմանագիր» խմբակցությունն այս պաշտոնում առաջադրել է Բարձր տեխնոլոգիական արդյունաբերության նախարար, Երեւանի նախկին քաղաքապետ Վահագն Խաչատրյանի թեկնածությունը։ Նա միակ թեկնածուն է, քանի որ ընդդիմությունը թափուր պաշտոնի թեկնածու չի առաջադրել։
Իր ելույթում Խաչատրյանը շնորհակալություն հայտնեց իշխող մեծամասնությանն իր նկատմամբ վստահության համար։ «Վստահ եմ, որ այս Ազգային ժողովը կկատարի իր պատմական առաքելությունը»,- ասաց թեկնածուն։ Նրա խոսքով՝ իշխանությունը պետք է ապահովի քաղաքացիների անվտանգությունը, ինչպես նաեւ երկիրը դնի զարգացման նոր ուղու վրա։ «Մեզ պետք են իմաստություն, կայունություն, միասնություն եւ վստահություն»,- ասաց նախարարը։
