Նախագահի ընտրությանը ընդդիմության մասնակցելը կօրինականացներ պետության ղեկավարի՝ գործադիր իշխանության կցորդ դառնալու գործընթացը, ինչպես այսօր տեղի է ունենում խորհրդարանի դեպքում։ Այս մասին մարտի 2-ին լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։
Նա կարծում է, որ Հայաստանի նախագահը պետք է լինի անկուսակցական, մինչդեռ ներկայիս թեկնածուն ընդհուպ մինչեւ կուսակցության անդամ առաջադրվելը եղել է եւ մնում է իշխանության ներկայացուցիչ։
Օհանյանի խոսքով՝ չմասնակցության հարցը մանրամասն քննարկվել է, եւ այս առումով ոչինչ չի փոխվել։ «Նախագահը պետք է հավասարակշռող, կոնսոլիդացնող դեր կատարի, իսկ քաղաքական թիմի կողմից նշանակված անձը չի կարող անաչառ լինել»,- ասաց Օհանյանը։
Գնահատելով չորրորդ նախագահի գործունեությունը, նա ընդգծեց, որ Արմեն Սարգսյանը չի կատարել իր պարտականությունները. «Սահմանադրության համաձայն՝ նա եղել է պետության ղեկավարը եւ պետք է ղեկավարեր արարողակարգային ընթացակարգերը։ Այս նորմը միշտ չէ, որ պահպանվել է․ 2020 թ․ մայիսի 28-ին նա սպասում էր վարչապետին, որ ծաղիկներ խոնարհի, այլ ոչ հակառակը։ Վարչապետն էր պարգեւատրում տավուշյան իրադարձություններից հետո, այլ ոչ թե նա»,- եզրափակեց Օհանյանը։
Նշենք, որ ընդդիմությունը՝ ի դեմս «Հայաստան» եւ «Պատիվ ունեմ» խմբակցությունների, բոյկոտել էր ՀՀ նոր նախագահի ընտրության հարցով քննարկումը։