ԱԺ-ի կողմից նախագահի ընտրությունից 10 օր անց պետք է տեղի ունենա նրա երդմնակալությունը։ Դրա համար Ազգային ժողովի հատուկ նիստ կգումարվի։ Այս մասին մարտի 3-ին Ազգային ժողովի նիստին փակ գաղտնի քվեարկության արդյունքների հրապարակումից եւ նոր նախագահի ընտրությունից հետո հայտարարեց իշխող «Քաղաքացիական պայմանագիր» կուսակցությունից ԱԺ փոխխոսնակ Հակոբ Արշակյանը։
Արտահերթ նիստի եւ նորընտիր նախագահի երդմնակալության օրվա վերջնական որոշումը կկայացնի ԱԺ խորհուրդը՝ քննարկելով ԱԺ նախագահի համապատասխան առաջարկը։
Խորհրդարանի ամբիոնից ելույթ ունեցավ այսօր Հանրապետության նախագահ ընտրված Վահագն Խաչատրյանը։ Նա շնորհակալություն հայտնեց իշխող կուսակցությանն իրեն ցուցաբերած վստահության համար։ «Զգացված եմ: Շնորհակալ եմ ինձ ցուցաբերած վստահության համար։ Ես շնորհակալ եմ բոլորիդ։ Հավանաբար, ես դեռ ի վիճակի չեմ լիովին գիտակցել այս պահի կարեւորությունն ու ինձ վստահված ամբողջ պատասխանատվությունը։ Բայց ես զգում եմ իմ պատասխանատվությունը»,- ասաց Խաչատրյանը։
