Շենգավիթ վարչական շրջանի ընդհանուր իրավասության դատարանում կկայանա «Սիլվայի գործով» դատական նիստը:
Գործով մեղադրյալներ են ՀՀ երկրորդ նախագահ Ռոբերտ Քոչարյանը եւ ՀՀ նախկին փոխվարչապետ, այժմ ընդդիմադիր «Հայաստան» խմբակցության պատգամավոր Արմեն Գեւորգյանը։
Հիշեցնենք, որ դատավոր Աննա Դանիբեկյանը վերջին նիստին մերժեց փաստաբանի միջնորդությունը ՍԴ դիմելու եւ գործի քննությունը կասեցնելու մասին։ ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը միջնորդեց Սահմանադրական դատարան դիմելու մասին՝ մեղադրանքի անորոշության պատճառով։ Ինչպես նշեց փաստաբանը, բողոքարկման առարկան Քրեական դատավարության օրենսգրքում առկա օրենսդրական բացն է։ Օրենսգիրքը դատարանին հնարավորություն չի տալիս պարզաբանել մեղադրանքը, երբ այն պարզ չէ շարադրված, սակայն, միեւնույն ժամանակ, պարզաբանելու պարտավորություն չի դնում դատախազի վրա։ Միաժամանակ փաստաբանը միջնորդություն ներկայացրեց գործի վարույթի կասեցման մասին։