«Սիլվայի գործով» դատական նիստը հետաձգվեց մինչեւ 16:00-ն։ Այս օրիգինալ որոշումը կայացրեց դատավոր Աննա Դանիբեկյանը՝ նիստին Արմեն Գեւորգյանի բացակայության հետ կապված։
Հիշեցնենք, որ դեռեւս մարտի 1-ի նիստին Գեւորգյանը հայտարարեց, որ մարտի 14-ին եւ 15-ին տեղի է ունենալու ԵԽԽՎ-ի՝ Ուկրաինայի հարցով արտահերթ նիստը, որին ինքը պետք է մասնակցի հեռակա կարգով։
Այնուամենայնիվ, դատավոր Դանիբեկյանը դատական նիստը նշանակեց մարտի 15-ին եւ սկսեց Գեւորգյանի բացակայության պատճառը ճշտելուց:
Արմեն Գեւորգյանի փաստաբան Լուսինե Սահակյանը դատավորին հիշեցրեց, որ գիտի, թե ինչու է իր պաշտպանյալը բացակայում։ Նիստը հետաձգելու միջնորդությունը դատարան էր ներկայացրել ինքը՝ Գեւորգյանը։
Աննա Դանիբեկյանը սկսեց ճշտել ԵԽԽՎ նիստի ժամանակացույցը, ընդ որում, ժամային տարբերությունը մեկնաբանեց հօգուտ Ստրասբուրգի։ Ստացվում էր, որ եթե Ստրասբուրգի ժամանակով նիստը պետք է սկսվեր ժամը 10:00-ին, ապա Երեւանի ժամով դա 07:00-ն է։ Դատավորին բացատրեցին, որ Երեւանի ժամով դա հենց 13:00-ն է։ Այնուամենայնիվ, Սահակյանը պարզաբանեց եւ հաստատեց, որ նիստն այժմ ընթացքի մեջ է։ Առաջին նիստը կտեւի 3 ժամ։
Այդ ժամանակ դատավորը պահանջեց, որպեսզի Գեւորգյանը ներկայանա առաջին նիստից հետո։ Փաստաբանի փորձերը՝ բացատրելու, որ պատգամավորներին ԵԽԽՎ նիստերի միջեւ ընդմիջում է անհրաժեշտ՝ հանգստանալու եւ երկրորդ մասին նախապատրաստվելու համար, արդյունք չտվեցին, դատարանը նույն կերպ արձագանքեց նաեւ այն փաստարկներին, որ եթե նիստն ավարտվում է ժամը 16:00-ին, ապա Գեւորգյանը կարող է դատարան գալ 16:30-ից ոչ շուտ։ Ընդ որում, ընդմիջումը տեւում է մեկ ժամ։
Նույնիսկ դատախազ Գեւորգ Բաղդասարյանը չառարկեց նիստի հետաձգմանը։ Նա դատավորին հարցրեց, թե ինչո՞ւմն է խնդիրը, կարո՞ղ է Գեւորգյանը ժամը 16:00-ին գալ։ «Նիստը հնարավոր չէ շարունակվել: Եւ մենք դեռ վերջին նիստին դա հասկացանք: ԵԽԽՎ նիստն ընթանում է հենց այս պահին, եւ ոչինչ չեմ կարող ասել»,- ասաց դատախազը։
Չնայած վերը նշվածին՝ Աննա Դանիբեկյանը նիստը հետաձգեց մինչեւ ժամը 16:00-ն, որպեսզի մինչ այդ Գեւորգյանը դատարան գա:
