«Սիլվայի գործով» նիստը, ինչպես եւ սպասվում էր, կրկին հետաձգվեց, այս անգամ՝ մեկ շաբաթով։
Հիշեցնենք, որ նիստն առավոտյան հետաձգվել էր մինչեւ 16:00-ն։ Չնայած նրան, որ ողջախոհությունն ու Արմեն Գեւորգյանի փաստաբանը միանշանակ ասում էին, որ մինչեւ ժամը 16-ն նրա ներկայությունն ապահովել հնարավոր չի լինի, այնուամենայնիվ, դատավոր Աննա Դանիբեկյանն նիստ նշանակեց այդ ժամին։ Սակայն, ինչպես եւ նախկինում, այն նշանակելով մարտի 15-ին, տեղյակ լինելով, որ այդ օրը Գեւորգյանը հեռավար մասնակցում է Ուկրաինայի հարցով ԵԽԽՎ արտահերթ նիստին։
Ժամը 16-ին պարզ դարձավ, որ Գեւորգյանը ներկա չէ եւ չի լինելու։ Փաստաբան Լուսինե Սահակյանը ընթերցեց պաշտպանյալի գրությունը, որում նա՝ ոչ առաջին անգամ, հայտնում է ԵԽԽՎ նիստին, փոխխոսնակ Ռուբեն Ռուբինյանի հետ ժամը 16-ին նախատեսված հանդիպմանը եւ «Հայաստան» խմբակցության հանդիպմանն իր մասնակցության մասին: Փաստաբանը ներկայացրեց նաեւ համապատասխան հաստատող փաստաթղթերը:
Դատախազ Գեւորգ Բաղդասարյանը մի քանի դատողություն հայտնեց նիստի կազմակերպման վերաբերյալ: Դատավորին խնդրելով չնեղանալ, քանի որ հնչեցրած քննադատությունը դատարանի օգտին է, Բաղդասարյանը հիշեցրեց, որ ԵԽԽՎ նիստին Գեւորգյանի առաջիկա մասնակցության մասին տեղյակ էին ե՛ւ դատարանը, ե՛ւ մասնակիցները։ Այնուամենայնիվ, եղավ այն, ինչ եղավ: Նրա խոսքով՝ եթե դատարանը թույլատրելի է համարում Գեւորգյանի մասնակցությունը ԵԽԽՎ նստաշրջանին, ապա պետք է համապատասխանաբար վարվեր, այլ ոչ թե մյուս մասնակիցներին ստիպեր այլ նիստի ընդմիջումն օգտագործել դատարանների միջեւ վազվզոցի համար։ «Նիստը տեղափոխել ժամը 16-ին, նորից բոլորիս կանչել եւ հայտարարել, որ նիստ չի լինելու։ Ինչի՞ համար է դա արվում»,- հետաքրքրվեց Բաղդասարյանը՝ հիշեցնելով, որ փաստաբանը փորձել է դատարանին հասցնել, որ Գեւորգյանը 16-ին ներկա չի լինելու։
Դատախազը դատարանին խնդրեց, որ քանի որ այն համաձայն է ԵԽԽՎ նիստին Գեւորգյանի մասնակցությանը եւ ընդհանրապես նրա խորհրդարանական գործունեությանը, նիստերը նշանակել ճկուն, ժամանակացույցից ելնելով, այլ ոչ թե ձեւական նշանակել եւ հետաձգել:
Հաջորդ նիստը կկայանա մարտի 22-ին՝ ժամը 13:00-ին։