Նախկին փոխվարչապետ, պատգամավոր Արմեն Գեւորգյանի փաստաբան Լուսինե Սահակյանն՝ ի նշան դատավորի գործողությունների դեմ բողոքի, լքեց նիստերի դահլիճը։

Արմեն Գեւորգյանը դատարանին փորձեց մի քանի հարց ուղղել՝ կապված մեղադրական կողմի անորոշության, իր ենթադրյալ լիազորությունների հետ, որոնք ինքը, իբր, օգտագործել է իրավախախտում կատարելու համար, իբր, գրավոր եւ բանավոր հանձնարարել է բնապահպանության նախկին նախարարին՝ աջակցել ձեռնարկատեր Սիլվա Համբարձումյանին լիցենզիա վաճառելու հարցում։

Դատավոր Դանիբեկյանը հիշեցրեց, որ իրավասու չէ մեղադրական եզրակացության շրջանակից դուրս բացատրություններ տալ, դատախազները հրաժարվել են դա անել։ Բացատրություն ստանալու պաշտպանական կողմի ջանքերն ապարդյուն անցան։

Փաստաբան Լուսինե Սահակյանը հիշեցրեց, որ գործընկերները փորձել են լուծել այս հարցը՝ միջնորդելով ՍԴ դիմելու մասին, սակայն դատարանը մերժել է միջնորդությունը։ Արդյունքում դատարանը չի կարողանում բացատրություն տալ, դատախազները՝ նույնպես։

Դատավորը համարեց, որ մեղադրանքը պարզված է եւ շտապեց անցնել հաջորդ փուլ։ Արմեն Գեւորգյանը շարունակեց հարցեր ուղղել։ 

Բոլոր մասնակիցներին լսելուց հետո դատավորը որոշեց անցնել ապացույցների ուսումնասիրմանը։ 

Սահակյանը հայտարարեց, որ մտադիր չէ մասնակցել անօրինական գործողություններին, եւ լքեց դահլիճը։ Դատավորը հեռացավ խորհրդակցական սենյակ։ Վճիռը կհրապարակվի այսօր ժամը 15:00-ին։

Խորհրդակցական սենյակից դուրս գալով՝ դատավորը հրապարակեց որոշումը՝ փաստաբանին տուգանել 50 հազար դրամով։ Հաջորդ նիստը կկայանա մարտի 29-ին ժամը 13:00-ին։