Մենք դեռ ամիսներ առաջ հայտարարում էինք, որ այս իշխանությունները երկիրը տանելու են թուրքացման ճանապարհով. Դա ենթադրում է Թուրքիայից կախյալ պետություն՝ տնտեսական, անվտանգային եւ բոլոր իմաստներով: Այս մասին այսօր՝ մարտի 22-ին, ԱԺ-ում ճեպազրույցի ժամանակ ասաց ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը՝ հավելելով, որ իրենք ամեն ինչ անելու են դա կանխելու համար:
«Սա լոկ հայ-թուրքական հարաբերությունների կարգավորման խնդիր չէ, սա ուրացում է Հայոց ցեղասպանության, մեր անժամանցելի իրավունքները, եւ առհասարակ, այն ինչ կատարվում է, չի բխում հայ ժողովրդի եւ Հայաստանի շահերից»,-ասաց նա:
Սաղաթելյանի խոսքով, Ադրբեջանը և Թուրքիան երբեք չեն կարող ազնիվ լինել իրենց մղումներում, որովհետև իրենք շատ բացահայտ օկուպացված Շուշիում ստորագրված հռչակագրով հաստատեցին, որ ցանկանում են մեր պետության վերացումը։
«Օրվա իշխանությունները դա չեն հասկանում և երկիրը տանում են դեպի անդունդ։ Ինչ վերաբերում է բուն բանակցություններին, ասեմ ավելին՝ իրենք փաստաթուղթ են քննարկում, հակառակ պարագայում ամեն անգամ հավաքվում են, ի՞նչ են անում։ Հավանաբար մշակվում է ինչ–որ փաստաթուղթ և փորձում են ինչ–ինչ հարցերի շուրջ համաձայնության գալ։
Եթե խոսքը վերաբերում է սահմանների բացմանը և հարաբերությունների կարգավորմանը, դա կարող էին մեկ գրությամբ կարգավորել, բայց պարզ է, չէ՞, որ խոսքը ուրիշ հարցերի մասին է, նախապայմանների մասին է՝թաքնված կամ բացահայտ։ Այս պարագայում շատ գործողություններ Թուրքիան համաձայնեցնում է Ադրբեջանի հետ»,– ասաց Սաղաթելյանը։
