ԵԱՀԿ գործող նախագահ, Լեհաստանի արտգործնախարար Զբիգնեւ Ռաուն մտահոգված է անկայուն իրավիճակով  Հարավային Կովկասի տարածաշրջանում։ Այդ մասին նա ԶԼՄ-ների ներկայացուցիչներին հայտարարել է ՀՀ արտգործնախարար Արարատ Միրզոյանի հետ հանդիպումից հետո։ Հիշեցնենք, որ Ռաուն Երեւանում է տարածաշրջանային այցի շրջանակներում։

Նրա խոսքով՝ հանդիպումների հիմնական մեսիջներից էր մտահոգությունն իրավիճակի անկայունության կապակությամբ։ Հայ գործընկերոջ հետ հանդիպման բովանդակությունը վերաբերում էր տարածաշրջանում տիրող իրավիճակին եւ Հայաստանի հետ համագործակցության հեռանկարներին։
Նախարարն ընդգծել է, որ ԵԱՀԿ-ում Լեհաստանի նախագահությունը նպաստում է Հայաստանի եւ Ադրբեջանի միջեւ երկխոսությանն ուղղված բոլոր նախաձեռնություններին։ «Իրական երկխոսությունը շատ կարեւոր է դեէսկալացման համար»,- ասել է Ռաուն՝ կոչ անելով կողմերին բարեխղճորեն մասնակցել երկխոսությանը բոլոր խնդիրների համապարփակ լուծման հասնելու համար։

«Հուսով ենք, որ կարող է առաջընթաց արձանագրվել, մասնավորապես՝ հրատապ հումանիտար հարցերում, ինչպիսիք են գերիների ազատ արձակումը, անհայտ կորածների մասին տեղեկատվության փոխանակումը, ականազերծումը, մշակութային արժեքների պաշտպանությունը»,- ընդգծել է ԵԱՀԿ գործող նախագահը, ում անհասցե կոչը գերիների վերաբերյալ ուղղված էր Ադրբեջանին։

Նա հիշեցրել է, որ Հայաստանի եւ ԵԱՀԿ-ի համագործակցությունը զարգացել է երկար տարիներ, ԵԱՀԿ-ն նպաստել է բարեփոխումներին Հայաստանում, եւ համագործակցությունը պետք է շարունակվի։ ԵԱՀԿ-ն պատրաստ է ուժեղացնել իր մասնակցությունը Հայաստանում եւ նոր ծրագրեր իրականացնել անվտանգության 3 հարթություններում, նշել է Ռաուն՝ հավելելով, որ իրավիճակը լայն տարածաշրջանում ակտիվություն եւ նախաձեռնողականություն է պահանջում։ Նա նաեւ շնորհակալություն հայտնել ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին խաղաղությանն ու կայունությանն ուղղված երկարամյա ջանքերի համար։