Ադրբեջանը շտապում է, քանի որ դիտվում է նոր աշխարհակարգի կազմավորման կարեւորագույն փուլերից մեկը: Այս մասին NEWS.am-ին TALK TIME ծրագրի շրջանակում տված հարցազրույցում ասել է քաղտեխնոլոգ Վիգեն Հակոբյանը:
Նա չի բացառել, որ Ռուսաստանի եւ Ուկրաինայի (որին աջակցում է Արեւմուտքը) միջեւ փաստաթղթի ստորագրումից հետո նոր աշխարհակարգի հիմքեր կդրվեն:
Հակոբյանը նկատել է, որ ոչ ոք չի կարող կանխատեսել, թե ինչպիսին կլինեն Ռուսաստանի աշխարհաքաղաքական շահերը:
«Օրինակ, կան Միութենական պետության ծրագրեր եւ այլն: Այս ժամանակահատվածում Բաքուն փորձում է առավելագույնը վերցնել իրեն: Հայտնի չէ, թե ինչպես կդասավորվեն Անակարայի եւ Մոսկվայի հարաբերությունները նոր աշխարհակարգի ձեւավորման արդյունքում: Այդ ֆոնին Ադրբեջանն ու Թուրքիան շտապում են՝ հաշվի առնելով նաև Հայաստանում գործող ներկայիս իշխանության գործոնը»,- ասել է նա:
Ինչ վերաբերում է Արցախում ռուս խաղաղապահների վարքագծին, ապա նրանք, փորձագետների գնահատումներով, այնտեղ են գտնվում ոչ թե կրակելու համար, այլ պահպանելու այն, ինչ արձանագրված է թղթի վրա:
«Բաքուն ասում է, որ Արցախի Պաշտպանության բանակի ստորաբաժանումներ չպետք է գոյություն ունենան: Խնդիրն այն է, որ փաստաթուղթ է ստորագրվել, որն այնպիսի կետեր է պարունակում, որոնք անհամապատասխանությունների տեղիք են տալիս: Սակայն Փաշինյանն ինքն է ստորագրել այդ փաստաթուղթը, եւ պետք է պարզաբանել, թե ինչ է նկատի առնվում «Արցախում հայկական ստորաբաժանումներ» արտահայտությամբ»:
Այսօր Մոսկվայից դժվար է սպասել ավելին, քան արվել է ՌԴ ՊՆ և ԱԳՆ հայտարարությունների տեսքով: Վիճահարույց կետերը կա՛մ պետք է վերացվեն, կա՛մ պետք է պատրաստ լինել նման միջադեպերի: Իսկ պատրաստվել Հայաստանը պարտավոր էր նոյեմբերի 9-ի հայտարարության ստորագրման պահից ի վեր:
Երեւվանը չպետք է դուրս գար Արցախում տեղի ունեցող ընթացակարգերից, այլ պետք է պահպաներ Արցախի անվտանգության երաշխավորի կարգավիճակը: Այժմ Հայաստանը լավագույն դեպքում կարող է պատասխանատու համարվել հանրապետության սոցիալ-տնտեսական դրության համար: Այս ամենը նոյեմբերի 9-ին եւ հունվարի 11-ին ստորագրված հայտարարություններից բխող քաղաքական որոշումների արդյունքն է դարձել: Այժմ արդեն Բաքուն փորձում է Արցախի ՊԲ մնացած ստորաբաժանումների հարցը լուծել ուժային ճանապարհով»,- հավելել է Հակոբյանը: