ՀՀ ԱԳ նախարար Արարատ Միրզոյանն իր իտալացի գործընկեր Լուիջի դի Մայոյին տեղեկացրել է ԼՂ հակամարտության գոտում տիրող իրավիճակի մասին: Այս մասին Միրզոյանը ԶԼՄ-ներին հայտնել է դի Մայոյի հետ հանդիպման ավարտին:
«Այսօր մենք մանրամասն քննարկել ենք միջազգային եւ տարածաշրջանային խաղաղության եւ կայունության հարցերը: ԵՍ ներկայացրել եմ իրավիճակը, որն առաջացել է ադրբեջանական ուժերի՝ Լեռնային Ղարաբաղի Փառուխ գյուղ ներխուժման, հակամարտության գոտում հրադադարի ռեժիմի պարբերական խախտման եւ Արցախում հումանիտար ճգնաժամ ստեղծելուն ուղղված քայլերի, էթնիկ զտումներ իրականացնելու ադրբեջանական քաղաքականության եւ այլ դրսեւորումների հետեւանքով:
Կարծում ենք, որ միջազգային հանրությունը պետք է աջակցի Հարավային Կովկասում խաղաղության հաստատմանն ուղղված ջանքերին»,- հայտարարել է նախարարը:
ԱԳ նախարարն ընդգծել է, որ ԵԱՀԿ ՄԽ համանախագահ երկրներն արդեն հստակ եւ հասցեական արձագանք են տվել վերջին սրումներին՝ արձանագրելով, որ դա ադրբեջանական զորքերի առաջխաղացման միջոց է դարձել:
Նախարարը հաստատել է հայկական կողմի պատրաստակամությունը խաղաղ բանակցություններին եւ խաղաղության համաձայնագրին՝ ԵԱՀԿ ՄԽ համանախագահների մանդատի ներքո: Նա եւս մեկ անգամ ընդգծել է, որ ադրբեջանական կողմից առաջարկներ են եղել, որոնք Հայաստանում ընդունելի են համարել, սակայն կիսով չափ, եւ լրացրել են իրենց առաջարկներով՝ հայտարարելով բանակցություններ վարելու պատրաստակամության մասին՝ ԵԱՀԿ ՄԽ շրջանակում լրացուցիչ առաջարկների հիման վրա:
«Անդրադարձել ենք նաեւ մինչ օրս չլուծված հումանիտար հարցերին: Դա, առաջին հերթին հայ գերիների անհապաղ ազատ արձակման անհրաժեշտությունն է»,- ընդգծել է նախարարը:
Միեւնույն ժամանակ նա բարձր է գնահատել անցյալ տարվա մարտին Իտալիայի խորհրդարանի կողմից ընդունված բանաձեւը:
Նախարարը մտահագություն է հայտնել հայկական հուշարձանների ճակատագրով, որոնք մնացել են Ադրբեջանի վերահսկողությանն անցած տարածքներում: Այս համատեքստում երկրի ԱԳ ղեկավարն ընդգծել է տարածաշրջանում ՅՈՒՆԵՍԿՕ-ի առաքելության կազմակերպման կարեւորությունը:
