Ադրբեջանի ՊՆ-ն հապճեպ ադրբեջանական անվանումներ է հորինում հայկական գյուղերի համար։

Ադրբեջանական լրատվամիջոցների տարածած հաղորդագրության մեջ Ադրբեջանի պաշտպանության գերատեսչությունն առաջին անգամը չէ, որ օգտագործում է հորինված ադրբեջանական տեղանուններ՝ էլ ավելի շփոթություն մտցնելով առանց այն էլ լարված իրավիճակում։

Ադրբեջանի ՊՆ-ի հաղորդմամբ՝ «ապրիլի 3-ին՝ ժամը 23:00-ի սահմաններում, հայկական զինված ուժերի ստորաբաժանումները Թովուզգալա շրջանի Մյուսյուրսքենդ բնակավայրում տեղակայված դիրքերից գնդակոծել են ադրբեջանական բանակի դիրքերը՝ Թովուզի շրջանի Աղդամ բնակավայրի ուղղությամբ»։

Այն, որ Ադրբեջանն այժմ որոշել է Տավուշի մարզի Բերդ շրջանն անվանել «Թովուզգալա», դժվար չէ կռահել։ «Մյուսյուրսքենդ» անվան հետ կապված իրավիճակն ավելի վատ է։ Ադրբեջանական քարոզչամեքենայի «չհսկելու» հետեւանքով համացանցային որոնողական համակարգի ռուսալեզու հատվածում չկա անգամ ամենաչնչին անդրադարձը, թե հայկական որ բնակավայրն են այդպես խրթին անվանում։ Բացառված չէ, որ խոսքը Մովսեսգեղ գյուղի մասին է եւ համահունչ է Ադրբեջանի կողմից հապճեպ հորինված տեղանունին։

Հատկանշական է, որ թեեւ Ադրբեջանում օգտագործում են իրենց «սեփական» տեղանունները, այնուամենայնիվ, չեն համարձակվում պնդել, որ գյուղը կամ շրջանը «օկուպացված» է Հայաստանի կողմից։