Դաշնային դատարանը որոշել է, որ Նիգերիայում ահաբեկչության գործերով բոլոր դատավարություններն այսուհետ դռնփակ կանցկացվեն, հայտնում է Reuters-ը։
Իր հայտարարության մեջ դատավոր Ջոն Տերհեմբա Ցոխոն նաեւ նշել է, որ նման դատավարությունների ցանկացած մասի լուսաբանումը կարգելվի։
Նա հայտնել է, որ նոր որոշումն ընդունվել է բոլոր կողմերի եւ հասարակության ներկայացուցիչների անվտանգությունը, ինչպես նաեւ արդար հետաքննություն ապահովելու համար:
Ավելի վաղ արգելված «Բիաֆրայի բնիկ ժողովուրդ» անջատողական շարժման առաջնորդ, ահաբեկչության մեջ մեղադրվող Ննամդի Կանուն հայց էր ներկայացրել՝ պնդելով, որ իրեն չի կարելի դատել, քանի ինքն ապօրինաբար է արտահանձնվել Քենիայից, վկայում են դատական փաստաթղթերը:
Նա անհետացել էր Նիգերիայից 2017-ին գրավի դիմաց ազատ արձակվելուց հետո։
Կանուն ձերբակալվել էր փախուստից մի քանի տարի անց։ Անցյալ տարի նրա փաստաբանն ասել է, որ նրա հետ վատ են վարվել Քենիայում կալանքի տակ գտնվելու ժամանակ՝ մինչ Նիգերիային վերադարձնելը:
