ՀՀ իշխանություններն իրեն ծիծաղելի ու զավեշտալի մեջ է դնում։ Այս մասին NEWS.am-ի TALK TIME հաղորդաշարի եթերում, մեկնաբանելով ՌԴ ԱԳ նախարար Սերգեյ Լավրովի հայտարարությունները ԵԱՀԿ Մինսկի խմբի ձեւաչափի վերաբերյալ, ասաց ՀՀԿ ներկայացուցիչ Էդուարդ Շարմազանովը:
Նախ ընդդիմադիրը հիշեցրեց, որ ԵԱՀԿ Մինսկի խումբը բաղկացած է երեք համանախագահներից՝ ԱՄՆ-ից, Ֆրանսիայից եւ Ռուսաստանից։ «Եւ համատեղ ասուլիսի ժամանակ ուղիղ եթերում վերոնշյալ կողմերից մեկը հայտարարում է, որ ինքը չկա, որ մնացած երկու երկրները չեն ցանկանում աշխատել իր հետ։ Դրան հաջորդում է մեր արտաքին գործերի նախարարի միանգամայն անհասկանալի մեկնաբանությունն այն մասին, որ իրենք այլ տեղեկություն ունեն այդ կապակցությամբ։ Ո՞վ ես դու։ Ի՞նչ ազդակ ես ստանում: Դա նույնն է, եթե ամուսինները որոշեն, որ բաժանվում են, իսկ հարեւանը միջամտի ու պնդի, որ բոլորովին այլ ազդակ ունի, որ կինը չի ցանկանում բաժանվել։ Կինը, իբր, չի ցանկանում ամուսնալուծվել: Լավրովն էլ երեկվա երեխան չէ: Նա ուղիղ հայտարարեց, որ իրենց հետ չեն ցանկանում աշխատել։ Միգուցե իրենք չեն ուզում, բայց հարցը դա չէ»,- պարզաբանեց Շարմազանովը։
Նա մեկնաբանեց նաեւ գործող իշխանության մեկ այլ ներկայացուցչի հայտարարությունը: Այդպես, ԱԺ արտաքին հարաբերությունների մշտական հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Էդուարդ Աղաջանյանը մատնանշել է պաշտոնական Երեւանի եւ Մոսկվայի դիրքորոշումների տարբերությունը։ «Դա, իբր, Լավրովի ընկալումն է։ Լավ, սրանց իրենց մեծամտությունը դաս չեղա՞վ»,- ցավով ասաց քաղաքական գործիչը՝ իշխանություններին մեղադրելով արեւմտասիրության մեջ:
