Գերմանիայում ձերբակալել են չորս անձի, որոնք կասկածվում են առողջապահության նախարարին առեւանգելու դավադրության եւ ամբողջ երկրում էլեկտրաէներգիայի անջատման նպատակով էլեկտրակայանները ոչնչացնելու մեջ, հայտնում է Reuters-ը։
Ըստ Գերմանիայի առողջապահության նախարար Կառլ Լաուտերբախի, իրեն առեւանգելու խափանված դավադրությունը ցույց է տվել, որ «կան ուժեր, որոնք COVID-19-ի սահմանափակումների դեմ բողոքի ցույցերն օգտագործում են պետությունը եւ երկրի ժողովրդավարական համակարգը ապակայունացնելու համար»: «Նրանք ոչ մեծ փոքրամասնություն են մեր հասարակության մեջ, բայց շատ վտանգավոր են»,- ասել է Լաուտերբախը մամուլի ասուլիսում:
Կասկածյալները կապված են եղել խմբերի հետ, որոնք բողոքում են COVID-19-ի սահմանափակումների դեմ, եւ ծայրահեղ աջ Reichsburger շարժման հետ, որը հերքում է ժամանակակից գերմանական պետության գոյությունը, ասվում է արեւմտյան Կոբլենց քաղաքի դատախազների հայտարարության մեջ:
«Սա ցույց է տալիս, որ COVID-ի դեմ բողոքի ցույցերը պարզապես չեն արմատականացել, եւ խոսքը միայն COVID-ի մասին չէ»,- ասել է Լաուտերբախը:
Նրան առեւանգելու դավադրությունը վերջինն է մի շարք միջադեպերից, որոնք վկայում են որոշ գերմանացիների զայրույթի մասին՝ չպատվաստվածների նկատմամբ սահմանափակումների եւ լայն հասարակության համար պատվաստումը պարտադիր դարձնելու առաջարկների հանդեպ:
Դեկտեմբերին ոստիկանությունը կասեցրել էր պատվաստումներին դեմ հանդես եկող ակտիվիստների դավադրությունը՝ արեւելյան Գերմանիայի Սաքսոնիա նահանգի վարչապետին սպանելու համար:
Վերջին դավադրության հիմքում ընկած կասկածյալները շփվել են Vereinte Patrioten կոչվող չատում, որը գերմաներեն նշանակում է «Միավորված հայրենասերներ», եւ «մտադիր են եղել ստեղծել քաղաքացիական պատերազմի նման պայմաններ եւ ի վերջո տապալել Գերմանիայում ժողովրդավարական համակարգը»,- ասել է դատախազությունը:
Իշխանությունները խուզարկել են անշարժ գույքի 20 օբյեկտ՝ Գերմանիայի մի քանի նահանգներում, առգրավելով զենքեր, այդ թվում՝ հրազեն, զինամթերք եւ Կալաշնիկովի ինքնաձիգներ, եվրոյով եւ արտարժույթով կանխիկ գումար, ինչպես նաեւ ոսկու ձուլակտորներ եւ արծաթե մետաղադրամներ:
Հայտնաբերվել են նաեւ պատվաստումների կեղծ վկայականներ եւ COVID-ի թեստեր, հայտնում է գերատեսչությունը։
