Արցախի ժողովրդի իրավունքների պաշտպանության տեսանկյունից ԵԱՀԿ գործող նախագահ Զբիգնեւ Ռաուի հետ հանդիպման ընթացքում հետաքրքրություն նկատելի չէր։ Այս մասին NEWS.am-ի՝ «ՈՒԺԻ ԳՈՐԾՈՆԸ» հաղորդաշարի ընթացքում ասաց Արցախի Մարդու իրավունքների պաշպան Գեղամ Ստեփանյանը։
«Հանդիպման ընթացքում իմ ամենամեծ խնդիրն էր ներկայացնել հումանիտար իրավիճակն Արցախում եւ Ադրբեջանի հանցավոր գործողությունների հետեւանքները, հասկացնելը, որ չի կարելի անտեսել մարդու իրավունքները։ Հանդիպումից իմ տպավորությամբ՝ աշխարհում շատ դժվար է տեղ հասցնել իրավունքների պաշտպանությունը։ Կարծես թե բոլորի համար ընդունելի է, որ կան իրավունքներ, որոնք պետք է պաշտպանել, բայց, ի վերջո, ամեն ինչ որոշվում է քաղաքական շահերով։ Եվ ես չտեսա հետաքրքրություն Արցախի ժողովրդի իրավունքների իրական պաշտպանության տեսանկյունից»,- նշեց Ստեփանյանը։
Գեղամ Ստեփանյանն ասաց, որ հանդիպման ընթացքում ասվել է, որ Արցախի կարգավիճակը բանակցությունների ընթացքում պետք է որոշեն երկու կողմերը։
«Մենք, իհարկե, սրան կողմնակից ենք, սակայն այնպես չէ, որ եթե այդ որոշումը դեմ լինի մեր իրավունքներին, մենք ընդունելու ենք»,- ընդգծեց Ստեփանյանը։