ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը  լքեց նիստերի դահլիճը՝ որպես դատավոր Աննա Դանիբեկյանի գործողությունների դեմ բողոքի նշան։

Նիստի սկզբից փաստաբանը խնդրեց լսել իր միջնորդությունը, ինչը, վստահ է Օրբելյանը, կդադարեցնի դատավարությունը։ Սակայն դատավորը նախ սահմանեց ապացույցների քննման կարգը, ապա լսվեց փաստաբան Արմեն Գեւորգյանի միջնորդությունը։

Այնուհետեւ դատավորը պատրաստվում էր ընդմիջում հայտարարել եւ հետո միայն անդրադառնա միջնորդությանը։ Դատավորի գործողությունները վրդովվեցրին, որպես կանոն, զուսպ Արամ Օրբելյանին:

Փաստաբանն ամենայն լրջությամբ առաջարկեց դատարանին քննարկել իր քայլը, ինչից հետո ինքը կլքի նիստերի դահլիճը։ «Կրկնում եմ՝ այս միջնորդությունից հետո դատավարությունը կդադարի։ Իսկ Դուք ինձ զրկում եք պաշտպանության գործիքակազմից։ Այն, որ դուք առաջարկում եք քննել ապացույցները եւ հետո միայն միջնորդությունը, ցույց է տալիս ձեր վերաբերմունքը միջնորդության նկատմամբ, եւ ես ստիպված եմ լքել նիստերի դահլիճը»,- ասաց Օրբելյանը։

Դատախազ Պետրոսյանը փաստաբանի գործողությունները արպես մանիպուլացում եւ իրավունքների չարաշահում որակեց՝ ասելով, որ «երեք տարի դատարանը չկարողացավ ոչ մի ապացույց քննել», իսկ միջնորդությունը, որը, ինչպես խոստացել էր Օրբելյանը, վերջ կտա գործընթացին, կարելի էր շատ ավելի շուտ ներկայացնել: Օրբելյանը կտրականապես չհամաձայնեց դրա հետ՝ ընդգծելով, որ դատարանի գործողություններն իրեն զրկում են պաշտպանության հնարավորությունից, իսկ նիստին ձեւական մասնակցել ինքը չի պատրաստվում:

Դատարանը հեռացավ խորհրդակցական սենյակ՝ փաստաբանի արարքի վերաբերյալ իր դիրքորոշումը պարզելու համար:

Հաջորդ նիստը կկայանա մայիսի 3-ին՝ ժամը 13:00-ին։