ՀՀ երկրորդ նախագահ Ռոբերտ Քոչարյանի նկատմամբ ինկվիզիտորական դատավարություն է իրականացվում: Այս մասին լրագրողների հետ զրույցում ասաց երկրորդ նախագահ Ռոբերտ Քոչարյանի փաստաբան Արամ Օրբելյանը։
Նշենք, որ դատավոր Աննա Դանիբեկյանի գործողությունների դեմ՝ ի նշան բողոքի Օրբելյանը լքել է նիստերի դահլիճը: Նիստի սկզբում փաստաբանը խնդրել էր լսել իր միջնորդությունը, սակայն դատավորը նախ սահմանել էր ապացույցների քննման կարգը, լսել փաստաբան Արմեն Գեւորգյանի միջնորդությունը, այնուհետև դատավորը պատրաստվում էր ընդմիջում հայտարարել, եւ հետո միայն անդրադառնալ Օրբելյանի միջնորդությանը։
Փաստաբանը մատնանշեց, որ դատարանը խախտել է գործողությունների հաջորդականության վերաբերյալ առավոտյան կայացված որոշումը՝ միաժամանակ հիշեցնելով, որ մեղադրանքի պարզաբանման փուլն ավարտված չէ։
«Քանի որ իրավական բաց կա, դա Սահմանադրական դատարան դիմելու ուղիղ ճանապարհն է, «դեֆեկտով» գործի քննությունը չի կարող շարունակվել։ Հարցն անհրաժեշտ է հստակեցնել՝ հաջորդ փուլ անցնելու համար։ Թե ինչ արարք կամ չարարք է կատարել Ռոբերտ Քոչարյանը, ինչո՞ւ են առհասարակ այս փողերը նրա հետ կապում, պարզ չէ, գրված չէ, թե կոնկրետ ինչում է նա մեղադրվում ,եղադրանքն ընդհանուր է՝ կաշառք է ստացել, դա ապացուցել կամ հերքել հնարավոր չէ։ Սա ինկվիզիցիոն դատավարություն է։ Հայաստանում դատավարությունը մրցակցային է, կառուցվում է մեղադրանքի հիման վրա, ամբաստանյալին պետք է հստակ եւ հասկանալի բացատրել, թե ինչում են նրան մեղադրում։ Իսկ այստեղ առաջարկվում է շրջանցել այդ ամենը, արդյունքում դատարանի որոշումը նույնպես անորոշ կլինի»,- ասաց Արամ Օրբելյանը։