Ոստիկանները Երեւանում անհնազանդության ակցիայի մասնակիցներից մեկին ծեծելով բերման են ենթարկում: 168.am-ում հրապարակված տեսանյութում երեւում է, թե ինչպես են ոստիկանները նրան բերման ենթարկում, իսկ այդ պհին ոստիկաններից մեկը բռունցքներով հարվածներ հասցնում նրա գլխին: Քաղաքացին կռացնում է գլուխը, որ պաշտպանվի հարվածներից: Այդպես նրան մտցնում են ավտոբուսը:

Ավելի ուշ ոստիկանությունից NEWS.am–ին փոխանցեցին, որ ոստիկանության պետի հանձնարարությամբ այդ դեպքով նշանակվել է ծառայողական քննություն։

Նշենք, որ Երևանում վաղ առավոտից սկսվել են խաղաղ անհնազանդության ակցիաները: Փակվել են մի շարք փողոցներ: Մասնավորապես, քաղաքացիները աղբամաններով փակել են Սայաթ-Նովա մայրուղին:, Փակ են Պուշկին-Մաշտոց խաչմերուկը, Հաղթանակի կամուրջի մոտ Արգիշտի փողոցը:

Ավելի վաղ NEWS.am-ը հայտնել էր, որ նախօրեին ընդդիմադիր ուժերը վրաններ էին տեղադրել և գիշերը մնացել Ֆրանսիայի հրապարակում։ ԱԺ փոխխոսնակ, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը երեկ հայտարարել է, որ այսօրվանից անհնազանդության խաղաղ գործողություններ են սկսվելու ամբողջ հանրապետությունով մեկ․ փակվելու են հատկապես մայրաքաղաքի կենտրոնական փողոցները։ Նա կոչ արեց որևէ գործ չպլանավորել՝ գործադուլ և դասադուլ իրականացնել։