ՀՀ գլխավոր դատախազությունն արձանագրել է Երևանում իրականացվող ակցիաների ընթացքում ՀՀ ԱԱԾ ՊՊԾ պետ Սարգիս Հովհաննիսյանի կողմից Mediahub.am-ի օպերատորին ոտքով հարվածելու դեպքը։

Գլխավոր դատախազությունից NEWS.am-ին հայտնեցին, որ այդ դեպքով ուսումնասիրություն է իրականացվում։

Դատախազությունում արձանագրվել է նաև ոստիկանության ծառայողի կողմից անհնազանդության ակցիայի մասնակցի գլխին բռնուցնքներով հարվածելու դեպքը, ինչը նույնպես ուսումնասիրվում է։

Ավելի վաղ NEWS.am-ը հայտնել էր, որ Սարգիս Հովհաննիսյանն այսօր Բաղրամյան-Պռոշյան փողոցների խաչմերուկում ոտքով հարվածել է «Մեդիահաբ»-ի օպերատորին, հարվածել լրագրողի միկրոֆոնին, սպառնացել ակցիայի մասնակցին։

Մեկ այլ տեսանյութում հստակ երևում էր, թե ինչպես է քաղաքացուն բերման ենթարկող ոստիկաններից մեկն աընդհատ ձեռքով հարվածներ հասցնում կռացած քաղաքացու դեմքին ու գլխին։

ՊՊԾ պետի արարքին անդրադարձել էր նաեւ «Իրազեկ քաղաքացիների միավորում» ՀԿ հմակարգող Դանիել Իոաննիսյանը, ով նշել էր, որ «Իրազեկ քաղաքացիների միավորումում» հանցագործության մասին հաղորդում է պատրաստում, քիչ անց կուղարկի դատախազություն: «Հույս ունեմ, որ որևէ մեկը չի հորինի, որ լրագրող ծեծելը ևս ինչ որ «պրատակոլով» է (ինչպես հորինում էին մարդ վրաերթելուց հետո չկանգնելն արդարացնելիս)»,-նշել էր նա։