Ֆրանսիայի հրապարակից այսօր՝ մայիսի 2-ին, մեկնարկել է ընդդիմադիրների երթը՝ Երևանի կենտրոնական փողոցներով։ Դրան նախորդել էր Ֆրանսիայի հրապարակում «Դիմադրության» շարժման հանրահավաքը։
Երթին մասնակցում է նաեւ ՀՀ երկրորդ նախագահ Ռոբերտ Քոչարյանը։
Նշենք, որ Երեւանում այսօր վաղ առավոտից` չնայած չդադարող անձրեւին, խաղաղ անհնազանդության ակցիաներ են սկսվել. փակվել են մի շարք փողոցներ:
Երեկ չորս խորհրդանշանակ վայրերից Երեւան են հասել Դիմադրության շարժման անդամները: Երեկոյան Ֆրանսիայի հրապարակում տեղի է ունեցել շարժման հանրահավաքը։ Հանրահավաքից հետո ընդդիմադիր ուժերը վրաններ էին տեղադրել եւ գիշերը մնացել Ֆրանսիայի հրապարակում։ ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հանրահավաքի ընթացքում հայտարարել է, որ այսօրվանից անհնազանդության խաղաղ գործողություններ են սկսվելու ամբողջ հանրապետությունով մեկ․ փակվելու են հատկապես մայրաքաղաքի կենտրոնական փողոցները։
Նշենք նաեւ, որ առավոտից բողոքի ակցիաների կարգավորման համար ոստիկանությունը առանձնակի բիրտ ուժ է կիրառել. ՊՊԾ գնդի հրամանատարը ոտքով հարվածել է լրագրողին, մեկ այլ լրագրողի ինքնազգացողությունն է վատացել հրմշտոցի ընթացքում, հրապարակված կադրերում երեւում են նաեւ ոստիկանների կողմից ցուցարարների ծեծի դեպքեր: Ժամը 14:00-ի դրությամբ ոստիկանության տարբեր բաժիններ է բերման ենթարկվել շուրջ 250 անձ, եղել են ԱԺ պատգամավորներին բերման ենթարկելու փորձեր: