2019 թվականի հոկտեմբերի 1-ին Երեւանում ստորագրվել է համաձայնագիր Հայաստանի, Բելառուսի, Ղազախստանի, Ղրղըզստանի, Ռուսաստանի, ԵԱՏՄ-ի եւ Սինգապուրի միջեւ։ Այս մասին Ազգային ժողովի նիստում «Եվրասիական տնտեսական միության եւ նրա անդամ պետությունների՝ մի կողմից, եւ Սինգապուրից Հանրապետության միջեւ՝ մյուս կողմից, համապարփակ տնտեսական համագործակցության մասին» շրջանակային համաձայնագրի վավերացման քննարկման ժամանակ հայտարարեց էկոնոմիկայի նախարար Վահան Քերոբյանը:
Փաստաթղթի նպատակն է բարենպաստ միջավայր եւ պայմաններ ստեղծել կողմերի միջեւ փոխադարձ հետաքրքրություն ներկայացնող ոլորտներում փոխադարձ առեւտրային հարաբերությունների եւ տնտեսական համագործակցության զարգացման, ինչպես նաեւ առեւտրի եւ ներդրումների ոլորտում կողմերի միջեւ խոչընդոտների վերացման համար, նվազեցնել գործնական ծախսերը եւ բարձրացնել տնտեսական արդյունավետությունը։ «Համաձայնագրով ամրագրված է կողմերի մտադրությունը՝ սահմանված կանոններին եւ լիազորություններին համապատասխան, համաձայնագրեր կնքել ապրանքների, ներդրումների եւ ծառայությունների ազատ առեւտրի մասին»,- ասաց Քերոբյանը։