Գերմանիայում Ռուսաստանի դեսպանությունը հայտարարել է Բեռլինում ռուս լրագրողների դեմ ահաբեկչությունը կանխելու մասին։ Դիվանագիտական ներկայացուցչության տվյալներով՝ ենթադրյալ ահաբեկիչները փորձել են հարձակվել բնակելի համալիրի վրա, որտեղ ապրում են Ռուսաստանից լրագրողներ եւ նրանց ընտանիքները։ Տեղի իշխանությունները առայժմ որեւէ կերպ չեն մեկնաբանել միջադեպը, գրում է «Կոմերսանտը»։
«Կեսօրին տան բնակարաններից մեկի պատուհանը կոտրվեց փողոցից նետված շշից»,- ՌԴ դեսպանության ներկայացուցիչները տեղի ունեցածը նկարագրում են դիվանագիտական ներկայացուցչության կայքում տեղադրված մամուլի հաղորդագրության մեջ։ Բնակելի համալիրի տարածքը զննելու ժամանակ տան խորշում հայտնաբերվել է ենթադրյալ ինքնաշեն պայթուցիկ սարք՝ բաղկացած «հեղուկով լցված մեծ տարայից, ինչպես նաեւ պլաստիկե շշից եւ գազի բալոնից, որի վրա ժապավենով լարեր էին ամրացված»:
Ռուսաստանի դեսպանությունը նոտա է հղել Գերմանիայի արտաքին գործերի նախարարությանը՝ պահանջելով հետաքննել միջադեպը եւ ռուս լրագրողների համար «նորմալ աշխատանքային պայմաններ ապահովել»։ Ռուսաստանի Դաշնության դիվանագիտական առաքելությունը միջադեպը կապել է «ռուսական պետական լրատվամիջոցների նկատմամբ Գերմանիայում սանձազերծված հալածանքի մթնոլորտի հետ» եւ ասել, որ սպառնալիքներ ստացած լրագրողների տվյալները տեղադրվել են սոցիալական ցանցերում եւ գերմանական լրատվամիջոցներում։
