Իտալական Dotto Creations ընկերությունը, որը ստեղծվել է դիզայներներ Ֆրանչեսկո Յանուցիի եւ Ջանլուկա Բարտոլոնիի համատեղ ջանքերով, ներկայացրել է նրանց ստեղծագործական գաղափարների առաջին մարմնավորումը՝ Biancaneve («Սպիտակաձյունիկ») մոտոցիկլետը, որն ստեղծվել է դասական Honda CX500-ի հիման վրա, գրում է «Տեխկուլտը»:
Biancaneve-ն իր հիմքում ընկած, 1979թ. արտադրության մոդելի վերաիմաստավորված ժամանակակից տարբերակն է: Իրենց առաջնեկի ստեղծման հարցում առանցքային գաղափարը մասնագետներն այսպես են ձեւակերպել. «հեռացնել բոլոր անպետք մասերը եւ առավելագույնս մոտենալ կատարյալին»:
Մասնավորապես, նրանք մոտոցիկլետի երկու կոնֆիգուրացիա են առաջարկել՝ կայանելիս եւ շարժման մեջ օգտագործելու համար: Նորույթի բոլոր արտաքին մասերը որոշել են սեւ ներկել, ինչպես նաեւ մի քանի դիզայներական տարրեր ավելացնել՝ ի տարբերություն նախորդ մոդելի:
Biancaneve մոդելի գլխավոր առանձնահատկություններից մեկն անսովոր տանիքն է, որով փակվում է նստելատեղը կայանման ժամանակ: Այն ներկվել է սպիտակ եւ փակ վիճակում բավականին ներդաշնակ տեսք է հաղորդում մոտոցիկլետին: Ենթադրվում է, որ նորույթը թողարկվելու է սահմանափակ քանակությամբ՝ 20 օրինակով: