Հարավային Կորեայի նոր նախագահ Յուն Սոկ Յոլը խոստացել է աջակցել Հյուսիսային Կորեայի զարգացմանը եւ օգնել նրա քաղաքացիներին, եթե այդ երկրում միջուկազերծում իրականացվի, տեղեկացրել է «ՌԻԱ Նովոստի»-ն։
Իր երդմնակալության արարողության ժամանակ ունեցած ելույթում Յուն Սոկ Յոլը հերթական անգամ Հյուսիսային Կորեային կոչ է արել «դադարեցնել միջուկային սպառազինությունների ստեղծումը եւ անցնել միջուկազերծման, ինչպես նաեւ խոստացել է այնպես անել, որպեսզի բանակցություններ լինեն։
«Ես դուռը բաց եմ թողնում Հյուսիսային Կորեայի հետ երկխոսության համար՝ ամբողջ աշխարհին եւ Ասիային սպառնացող նրա միջուկային զենքի զարգացման վերաբերյալ, հանուն հարցի խաղաղ լուծման»,- ասել է Յուն Սոկ Յոլը։
Նա նաեւ խոստացել է, որ Հարավային Կորեան, միջազգային հանրության հետ համագործակցելով, կօգնի «բարելավել հյուսիսկորեացիների կենսամակարդակը» եւ Հյուսիսային Կորեայի տնտեսությունը, եթե վերջինը դադարեցնի միջուկային զենքի ստեղծման աշխատանքները եւ անցնի իրական միջուկազերծման։
«Հյուսիսային Կորեայի միջուկազերծումը ոչ միայն երկարատեւ խաղաղություն կբերի Կորեական թերակղզում, այլեւ մեծ ավանդ կլինի Ասիայում եւ ամբողջ աշխարհում խաղաղության եւ բարգավաճման հաստաստման գործում»,- ասել է Յուն Սոկ Յոլը։
