Բելառուսի նախագահ Ալեքսանդր Լուկաշենկոն աշխատանքային այցով մեկնել է Մոսկվա, որտեղ մասնակցելու է Հավաքական անվտանգության կազմակերպության պայմանագրի (ՀԱՊԿ) հոբելյանական գագաթաժողովին եւ կբանակցի ՌԴ նախագահ Վլադիմիր Պուտինի հետ։ Այս մասին տեղեկացրել է «Բելտա» գործակալությունը։
Մինչ այդ Բելառուսի նախագահի մամուլի ծառայությունից տեղեկացրել էին, որ ՀԱՊԿ-ի երկրների ղեկավարները կարծիքներ կփոխանակեն տարածաշրջանում եւ աշխարհում ընթացիկ իրավիճակի հրատապ հարցերի վերաբերյալ, կքննարկեն ծագող տարաբնույթ մարտահրավերներին եւ սպառնալիքներին համատեղ արձագանքելու միջոցները։ ՌԴ նախագահի հետ հանդիպման ընթացքում քննարկվող թեմաներից են լինելու «կոոպերացիայի զարգացման եւ ներմուծման փոխարինման ուղղությամբ տարվելիք աշխատանքի հետ» կապված հարցերը։