«Դիմադրություն» շարժման ավտոերթերից մեկի ընթացքում Մյասնիկյան պողոտայում (Նոր Նորքից իջնող ճանապարհին, Կամրջի հարեւանությամբ) ոստիկանները տուգանեցին վարորդներից մեկին։ Երթի ժամանակ մեքենային ամրացված դրոշը փակել էր մեքենային համարանիշները, ինչը ոստիկանները համարեցին վարչական իրավախախտում և տուգանեցին վարորդին 25․000 դրամով։
Վարորդները պնդում էին, որ քամին է փակել համարանիշը իսկ լրագրողի հարցին՝ հիմա քամուն ենթարկելո՞ւ եք պատասխանատվության, ոստիկանության աշխատակիցնը պատասխանեց. «Լո՞ւրջ եք խոսում: Եթե դուք կարողանաք քամուց հարցազրույց վերցնել, ես էլ պատասխանատվության կենթարկեմ»:
Տվյալ ավտոմեքենայի վարորդը հրաժարվեց ստորագրել արձանագրության տակ՝ հիմնավորելով, որ համաձայն չէ տուգանքի որոշման հետ։
Ինչից հետո լարվածություն սկսվեց ավտոերթի մասնակիցների և ոստիկանների միջև։ Կարմիր բերետավորները սկսեցին բերման ենթարկել մեքենայի վարորդներին։
Հիշեցնենք, որ այսօր՝ մայիսի 16-ին, Երեւանում «Դիմադրության» շարժումը 5 ուղղություններով ավտոեթեր է անցկացնում:
Նախօրեին ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հայտարարել էր. «Առավոտյան ժամը 8:00-ից սկսում ենք տարբեր տեսակի ակցիաներ, տեղի են ունենալու ավտոերթեր, հաշվի առնելով եղանակային պայմանները հանրահավաք տեղի չի ունենալու: Իսկ երեքշաբթի օրը ես համարում եմ շատ կարեւոր օր, այդ օրը առավոտյան ժամը 8:00-ին ամբողջ մայրաքաղաքում պետք է տեղի ունենան անհնազանդության ակցիաներ, մենք պետք է ձեւավորենք 80-100 խմբեր, որոնք պետք է դուրս գան փողոց, որպեսզի ամբողջ քաղաքը կասեցնենք»: