Ռուսաստանը պարզապես չի հաշտվի ՆԱՏՕ-ին Ֆինլանդիայի եւ Շվեդիայի անդամակցության հետ, ասել է արտաքին գործերի փոխնախարար Սերգեյ Ռյաբկովը՝ Արեւմուտքին կոչ անելով այս առիթով պատրանքներ չփայփայել, տեղեկացրել է «ՌԻԱ Նովոստի»-ն։
«Ռազմական լարվածության ընդհանուր մակարդակը բարձրանում է, իսկ կանխատեսելիությունն այս ոլորտում՝ նվազում։ Ափսոս, որ առողջ բանականությունը զոհաբերվում է ինչ-որ ֆանտոմային պատկերացումների այն մասին, թե ինչ պետք է անել ստեղծվող իրավիճակում»,- ընդգծել է դիվանագետը։
ԱԳՆ փոխարտգործնախարարը հավաստիացրել է. ամբողջ իրավիճակը Շվեդիայի եւ Ֆինլանդիայի ղեկավարության սխալն է՝ հեռուն գնացող հետեւանքներով, այն ցուցադրում է այն անձանց մակարդակը, որոնք այդ երկրներում որոշումներ են կայացնում։
«Մենք իրավիճակին նայում ենք ամբողջության մեջ։ Իրավիճակն, իհարկե, արմատապես փոխվում է տեղի ունեցողի համատեքստում։ Վերջին ժամանակներս մեր կողմից տարբեր մակարդակներով մեկնաբանություններ են արվել։ Այդ ամենը այն բանի միանգամայն կեղծ եւ խեղաթյուրված ընկալման արտացոլումն է, ինչը տեղի է ունենում աշխարհում, Արեւմուտքում եւ, մասնավորապես, Հյուսիսային Եվրոպայի երկրներում, քաղաքականակերտ շրջանակների կողմից։ Այն, որ Շվեդիայի, ինչպես եւ Ֆինլանդիայի անվտանգությունը այս որոշման արդյունքում կամրապնդվի, մեզ համար միանգամայն ակնհայտ է»,- շարունակել է Ռյաբկովը։
Նա ավելացրել է. «Թե ինչպես Ռուսաստանը կսկսի ապահովել իր անվտանգությունը ՆԱՏՕ-ի ընդհանուր դասավորության փոփոխությունից հետո՝ առանձին հարց է։ Դրա լուծումը կախված կլինի այն բանից, թե կոնկրետ ինչ հետեւանքների կհանգեցնի Հյուսիսատլանտյան դաշինքին երկու երկրների միանալը»։
Նախօրեին Շվեդիայի կառավարող սոցիալ-դեմոկրատական աշխատանքային կուսակցությունը հայտարարել էր ՆԱՏՕ-ին անդամակցելու հայտ ներկայացնելու որոշման մասին։ Ընդգծվել է, որ Ստոկհոլմը, հավանության դեպքում, դեմ հանդես կգա երկրի տարածքում միջուկային զենքի եւ ռազմակայանների տեղակայմանը։ Վարչապետ Մագդալենա Անդերսոնն ասել է, որ ՆԱՏՕ-ին անդամակցությունը դրականորեն կանդրադառնա երկրի եւ շվեդ ժողովրդի անվտանգության վրա։
