News
Լրահոս
News
Երկուշաբթի
Հունիս 27
USD
408.56
EUR
430.54
RUB
7.67
Տեսնել լրահոսը

Ավստրալիայի իշխանությունները նախատեսում են ավելի քան 310 միլիոն դոլար ներդնել Boeing Loyal Wingman արհեստական բանականությամբ ռեակտիվ մարտական անօդաչու թռչող սարքերի (ԱԹՍ) ստեղծման մեջ։ Այս մասին հայտարարել է երկրի պաշտպանության նախարար Փիթեր Դաթոնը, փոխանցում է ՏԱՍՍ-ը։

«Այս ներդրումները թույլ կտան կառուցել յոթ անօդաչու թռչող սարքեր, որոնք վերջերս ստացել են MQ-28A Ghost Bat անվանումը, որոնք առաջիկա երկու տարվա ընթացքում ծառայության կանցնեն Ավստրալիայի ռազմաօդային ուժերում»,- ասել է նախարարը:

Դաթոնը նաեւ հիշեցրել է, որ նախկինում Ավստրալիան արդեն ավելի քան 100 միլիոն դոլար է ներդրել իր օդուժի համար անօդաչու թռչող սարքեր ստեղծելու մեջ, ինչի համար պայմանագիր է կնքվել Boeing-ի ավստրալական ստորաբաժանման հետ։

«Boeing-ի հետ մեր համագործակցության առաջին չորս տարիներին հաջողությամբ նախագծվել, կառուցվել եւ գործարկվել է 50 տարվա ընթացքում ավստրալական արտադրության առաջին ռազմական մարտական ինքնաթիռը: Սակայն այսօր հայտարարված ներդրումների շնորհիվ մենք ակնկալում ենք, որ MQ-28A համակարգերը ռազմաօդային ուժերում ծառայության կանցնեն արդեն 2024 թվականի վերջին կամ 2025 թվականի սկզբին»,- ընդգծել է նա։

Մարտական անօդաչու թռչող սարքի բաղադրիչները նախատեսվում է արտադրել երկրի մի քանի շրջաններում, իսկ վերջնական հավաքումը տեղի կունենա Թուվումբա քաղաքի նոր գործարանում։ Մոտ 80 ավստրալական ընկերություններ եւ ձեռնարկություններ պետք է մասնակցեն ԱԹՍ-ների արտադրությանը, ինչը թույլ կտա ապագայում այս տեսակի սպառազինություն արտահանել։

 

!
Այս նյութը հասանելի է նաև   English and Русский
Տպել
Ֆոտոռեպորտաժներ