ԵՄ-ն եւ ԱՄՆ-ը պայմանավորվել են ավելի սերտորեն համագործակցել՝ ուկրաինական ճգնաժամի հետեւանքով արդյունաբերական ապրանքների եւ սննդամթերքների մատակարարման խափանումներին դիմակայելու, ինչպես նաեւ Մոսկվայից ապատեղեկատվության դեմ պայքարելու համար:
ԵՄ-ի եւ ԱՄՆ-ի բարձրաստիճան պաշտոնյաները հավաքվել են Փարիզում, որպեսի մասնակցեն Առեւտրի եւ տեխնոլոգիաների երկրորդ խորհրդին, որն ի սկզբանե դիտարկվում էր որպես Չինաստանի անդրատլանտյան հակակշիռ, բայց այժմ հստակ շեշտադրում է նաեւ Ռուսաստանը:
Համատեղ հայտարարության մեջ երկու դաշնակիցները նշել են, որ կշարունակեն համակարգել իրենց գործողությունները՝ ուկրաինական պատերազմի բացասական հետեւանքները մեղմելու համար:
Եվրամիությունը եւ Միացյալ Նահանգները կաշխատեն խրախուսել գյուղատնտեսական ապրանքների եւ ներդրումների ավելի դիվերսիֆիկացված առեւտուրը, ինչպես նաեւ նվազեցնել որոշակի առեւտրային գործընկերներից կախվածությունը, որպեսզի բարձրացնեն սննդամթերքի համաշխարհային արտադրության կայունությունը:
Կողմերը նաեւ պայմանավորվել են համագործակցել, որպեսզի նվազեցնեն կախվածությունը ռազմավարական մատակարարումների անվստահելի աղբյուրներից եւ համատեղ մեղմեն Ռուսաստանից կարեւոր նյութերի մատակարարման հանկարծակի խափանումների բացասական ազդեցությունը: