Ռուսական բանկում գազի դիմաց վճարելու համար ռուբլով հաշիվներ բացելը կխախտի պատժամիջոցներն այն բանից հետո, երբ Բրյուսելը թարմացված հրահանգներ է տվել այն մասին, թե ինչպես ընկերությունները կարող են օրինական կերպով շարունակել գնել ռուսական վառելիքը, գրում է Reuters-ը:
ԵՄ երկրներին տրամադրված թարմացված ուղեցույցում հանձնաժողովը կրկնել է իր նախկին հանձնարարականը, որ ԵՄ պատժամիջոցները չեն խանգարում ընկերություններին հաշիվներ բացել որոշ բանկերում:
Սակայն Եվրահանձնաժողովի ներկայացուցիչը երեքշաբթի հայտարարել է, որ «Գազպրոմբանկ»-ում ռուբլով հաշիվ բացելը կխախտի ԵՄ պատժամիջոցները:
Խառնաշփոթը բխում է նրանից, որ Եվրոպայում գազի գնորդները չեն կարողանում լուծել վճարման գլուխկոտրուկը և կարծես թե տարբեր դիրքորոշումներ են ընդունում վճարումների սխեմայի վերաբերյալ:
Ֆիննական էլեկտրաէներգիայի պետական մատակարար Gasum-ը երեքշաբթի ասել է, որ վճարումներ չի կատարի Գազպրոմի առաջարկած վճարման մեխանիզմի շրջանակում և կներկայացնի իր վեճը ռուբլով վճարումների վերաբերյալ արբիտրաժին:
«Այս իրավիճակում Gasum-ին այլ բան չէր մնում, քան պայմանագիրը հանձնել արբիտրաժին: Այս դժվարին իրավիճակում մենք ամեն ինչ կանենք, որպեսզի կարողանանք մեր ֆինն հաճախորդներին մատակարարել անհրաժեշտ էներգիան»,- ասել է Gasum-ի գործադիր տնօրեն Միկա Վիլյանենը:
Ի հակադրություն,՝ ֆրանսիական Engie էներգետիկ ընկերությունը երեքշաբթի հայտարարել է, որ իր հաջորդ եվրո վճարումը կկատարի ռուսական գազային հսկային մինչև ամսվա վերջ, քանի որ երկու ընկերությունները համաձայնության են եկել եվրոպական պատժամիջոցներին համապատասխան լուծման շուրջ:
Գերմանական RWE ընկերությունը երկուշաբթի օրը հայտնել է, որ Ռուսաստանում գազի դիմաց եվրոյով վճարելու համար հաշիվ է բացել:
Իտալական Eni-ն հայտնել է, որ առաջիկա ժամերին կամ օրերին որոշում կկայացնի ռուսական գազի դիմաց վճարելու վերաբերյալ։
Ռուսաստանը անցյալ ամիս դադարեցրել է գազի մատակարարումը Բուլղարիային և Լեհաստանին այն բանից հետո, երբ նրանք հրաժարվել են կատարել ռուբլով վճարման իրենց պահանջը:
