News
Լրահոս
News
Հինգշաբթի
Հունիս 30
USD
408.31
EUR
429.75
RUB
7.83
Տեսնել լրահոսը

Պանթուրանական շղթան անցնում է Սյունիքով, եւ պատահական չէ, որ թուրք-ադրբեջանական տանդեմի ախորժակն ու գերխնդիրն է վերջապես իրականացնել երազանքները եւ, օգտվելով Հայաստանի թուլացած վիճակից, պատմական հաղթանակ արձանագրել։ Այս մասին, այսօր՝ մայիսի 22-ին, Ֆրանսիայի հրապարակում տեղի ունեցած քննարկման ժամանակ հայտարարեց ՀՅԴ Բյուրոյի անդամ, Հայաստան դաշինքի պատգամավոր Արմեն Ռուստամյանը։

Ըստ քաղաքական գործչի՝ Հայաստանը աշխարհին միշտ հետաքրքրել է երկու բանով՝ ատոմակայանով եւ նրանով, որ գտնվում է պանթուրքական շղթան կտրող աշխարհաքաղաքական գծի վրա։

Ընդ որում՝ նա նշեց, որ ատոմակայանը, բացի էներգիայի ապահովման իր անմիջական խնդրից, ապահովում է նաեւ Հայաստանի աշխարհաքաղաքական նշանակությունը։

«Պանթուրանական այս շղթան անցնում է Սյունիքով, եւ պատահական չէ, որ թուրք-ադրբեջանական տանդեմի ախորժակն ու հիմնական խնդիրն է վերջնականապես իրականացնել իրենց երազանքները եւ, օգտվելով Հայաստանի թուլացած վիճակից, պատմական հաղթանակ արձանագրել»,- ասաց պատգամավորը։

Նրա խոսքով, Սյունիքի «միջանցքի» մասին խոսակցությունները կշարունակվեն։

«Մենք պետք է հասկանանք, որ մեր աշխարհաքաղաքական նշանակությունը կվերանա, եթե Հայաստանը հանկարծ գնա նման զիջումների, եւ այդ միջանցքը նրանից անցնի ադրբեջանա-թուրքական տանդեմի վերահսկողության դաշտ։ Մենք կհայտնվենք աշխարհաքաղաքական պարկի մեջ եւ որպես գործոն այլեւս ոչ մեկին չենք հետաքրքրի... Մենք հայկական գործոնը պահպանելու խնդիր ունենք»,- ընդգծեց Արմեն Ռուստամյանը։

Որպես երկրորդ խնդիր՝ քաղաքական գործիչը նշեց հայերի իրավունքների պահպանման խնդիրը։ Նա ընդգծեց, որ աշխարհաքաղաքական իրավիճակը կարող է փոխվել այնպես, որ այսօրվա դրված խնդիրները վաղն արդեն կյանքի կոչվեն։

Պատգամավորի խոսքով՝ մենք, որպես սերունդ, չպետք է այնպես անենք, որ հաջորդ սերունդն այլեւս իմաստ չտեսնի իր իրավունքների ու պատմական արդարության վերականգնման ու պահպանման մեջ։

 

!
Այս նյութը հասանելի է նաև   Русский
Տպել
Ֆոտոռեպորտաժներ