Հնդկաստանի հարավում դատարանը 10 տարվա ազատազրկման է դատապարտել մի տղամարդու, որը հարսանեկան օժիտի պատճառով բռնության է ենթարկել կնոջը, որը հանգեցրել է վերջինիս ինքնասպանության, հայտնում է CNN-ը։
Կերալի շրջանային դատարանը Կիրան Կումարին մեղավոր է ճանաչել «օժիտի պատճառով մահվան» մասին հնդկական օրենքի համաձայն, որը թույլ է տալիս մեղադրանքներ առաջադրել մարդկանց՝ ամուսնության առաջին յոթ տարիների ընթացքում կնոջ մահվան պատճառ դառնալու համար:
Օժիտը, որն անօրինական է, բայց սովորական բան է Հնդկաստանում, հարսանեկան նվեր է հարսի ընտանիքի կողմից փեսայի ընտանիքին:
Կումարն իրեն մեղավոր չի ճանաչել։
Կումարը մեկ տարուց ավելի ամուսնացած է եղել Վիսմայա Նաիրի հետ, երբ անցած հունիսին նրան մահացած են գտել Կերալում գտնվող ամուսնու տան լոգարանում:
Նաիրի ընտանիքը համաձայնել է Կումարին որպես օժիտ տալ 100 սովերեն ոսկի, մեկ ակր հողատարածք եւ մեքենա, սակայն դատարանի փաստաթղթերի համաձայն՝ նրան դուր չի եկել մեքենայի մոդելը, եւ նա ավելի շատ գումար է պահանջել։ Դատավճռում նշվում է, որ Կումարը ֆիզիկական եւ բանավոր բռնության է ենթարկել Նաիրին։ «Նա կորցրել է կյանքի հանդեպ հետաքրքրությունը»,- ասվում է դատարանի որոշման մեջ։ «Նա հուսահատվել է: Հուսահատության զգացումը տիրել է նրան։ Մահվանից քիչ առաջ նրան դաժան բռնության են ենթարկել իր օժիտի պատճառով»։
1980-ականներին օրենսդիրները Հնդկաստանի Քրեական օրենսգրքում ավելացրել են բաժիններ, որոնք թույլ են տալիս իշխանություններին մեղադրել տղամարդկանց կամ նրանց ընտանիքի անդամներին «օժիտի պատճառով մահվան» մեջ: Մեղադրանքը, որը կարող է առաջադրվել նաեւ ինքնասպանության դեպքում, պատժվում է յոթ տարվա ազատազրկումից մինչեւ ցմահ ազատազրկմամբ։
Հնդկաստանի հանցագործությունների գրանցման ազգային բյուրոյի տվյալներով՝ 2020 թվականին երկրում օժիտի հետ կապված ավելի քան 10 000 բողոք է եղել եւ օժիտի պատճառով՝ մոտ 7000 մահ:
