Անբարեխիղճ լրագրողների եւ ԶԼՄ-ների հասցեին նախազգուշացումներ արվել են նաեւ «Զանգվածային լրատվության մասին» օրենքում ԱԺ-ի կողմից հաստատված վերջին փոփոխություններից առաջ։ Նրանք նախկինում էլ են խախտումներ թույլ տվել։ Այս մասին մայիսի 26-ին Ազգային ժողովում ավանդական ճեպազրույցների ժամանակ հայտարարեց «Քաղաքացիական պայմանագիր» խմբակցության քարտուղար Արթուր Հովհաննիսյանը։
Այդ նախազգուշացումները, ըստ նրա, արվել են ոչ այնքան քաղաքական կառույցների ու մարմինների, որքան հենց խորհրդարանի ապարատի կողմից։ «Խորհրդարանի ապարատն իրականացնում է իր գործառույթներն ու լիազորություններն՝ անկախ դրանում ներկայացված քաղաքական ուժերից եւ ուսակցություններից։ Եթե խախտումներ են լինում, այն արձանագրում է դրանք՝ այդ մասին հայտնելով համապատասխան լրատվամիջոցին, որպեսզի այն, իր հերթին, կա՛մ թղթակցին նորով փոխարինի, կա՛մ ամեն ինչ թողնի՝ ինչպես կա»,- պարզաբանեց Հովհաննիսյանը։
Նա շտապեց շնորհակալություն հայտնել բոլոր այն լրագրողներին, ովքեր հետեւում են էթիկայի նորմերին եւ բարեխղճորեն իրականացնում են իրենց մասնագիտական գործունեությունը։ Օրենքի նոր փոփոխությունները, սակայն, ըստ պատգամավորի, էթիկայի հետ կապ չունեն. «Խոսքը պետական տարբեր մարմինների աշխատանքային տարածքում գործող կանոնների մասին է։ Դրանք էթիկայի հետ կապ չունեն։ Դրանք ամրագրված են հավատարմագրման համապատասխան ընթացակարգերում, եւ ԶԼՄ-ների լրագրողները դրանց ծանոթանում են հավատարմագրման ժամանակ»,- եզրափակեց Հովհաննիսյանը:
Հիշեցնենք, որ մայիսի 25-ին ԱԺ նիստին պատգամավորները երկրորդ եւ վերջնական ընթերցմամբ հավանություն տվեցին «Զանգվածային լրատվության մասին» օրենքում լրացումներ կատարելու մասին օրինագծին։ Այսպիսով, Հայաստանում լրագրողի հավատարմագրումն այսուհետ կարող է դադարեցվել ոչ միայն իր ներկայացրած լրատվամիջոցի, այլեւ նրան հավատարմագրած պետական մարմնի պահանջով։