Հայաստանի եւ Ադրբեջանի սահմանների սահմանազատման եւ անվտանգության հարցով ազգային հանձնաժողովների առաջին նիստը, որը կայացել է մայիսի 24-ին երկու երկրների սահմանին, կառուցողական մթնոլորտում է անցել։ Այս մասին ՏԱՍՍ-ին տված հարցազրույցում ասել է հայկական հանձնաժողովի նախագահ, հանրապետության փոխվարչապետ Մհեր Գրիգորյանը։
«Իսկապես, մայիսի 24-ին մենք առաջին հանդիպումը անցկացրինք սահմանին։ Այս հանդիպմանը քննարկել ենք հետագա համատեղ աշխատանքի բացառապես կազմակերպչական հարցեր, եւ այս առումով հանդիպումը համարում եմ բավականին կառուցողական։ Դեռեւս չկան պայմանավորվածություններ սահմանազատման եւ սահմանների անվտանգության հարցերով հանձնաժողովների հաջորդ նիստի ժամկետի վերաբերյալ, սակայն կա հաստատում, որ հանդիպումը կկայանա Մոսկվայում»,- ասել է նա։
Գրիգորյանը հաստատել է, որ հաջորդ շաբաթ Մոսկվայում Հայաստանի, Ռուսաստանի եւ Ադրբեջանի փոխվարչապետների համատեղ նախագահությամբ կկայանա տարածաշրջանում տրանսպորտային եւ տնտեսական կապերի ապաշրջափակման եռակողմ աշխատանքային խմբի նիստը։
«Այս հանդիպման կոնկրետ ժամկետն այժմ համաձայնեցման փուլում է, իսկ հանդիպման օրակարգում ներառված են Հայաստանի, Ռուսաստանի եւ Ադրբեջանի ղեկավարների 2020 թվականի նոյեմբերի 9 (10) եւ 2021 թվականի հունվարի 11-ի եռակողմ հայտարարության 9-րդ կետում նշված պայմանավորվածությունների կատարմանն առնչվող հարցեր։ Այս օրակարգը սահմանազատման հետ կապ չունի»,- հավելել է նա:
Հայաստանի վարչապետ Նիկոլ Փաշինյանը եւ Ադրբեջանի նախագահ Իլհամ Ալիեւը մայիսի 23-ին հրամանագրեր են ստորագրել սահմանների սահմանազատման եւ անվտանգության հանձնաժողովներ ստեղծելու մասին։