Եվրամիության առաջնորդները գագաթաժողովում կփորձեն պայմանավորվել, որ պատժամիջոցների պատրաստվող փաթեթը ռուսական նավթի ներկրման էմբարգո ներառի, բայց կհանեն խողովակաշարով հում նավթի մատակարարումները: Միաժամանակ, չկարողանալով համաձայնեցնել նավթային էմբարգոյի բոլոր մանրամասները, առաջնորդները փաթեթի վերջնական համաձայնեցումը կթողնեն ավելի ուշ ժամկետի, գրում է Reuters-ը։
«Եվրոպական խորհուրդը համաձայն է, որ Ռուսաստանի դեմ պատժամիջոցների վեցերորդ փաթեթը տարածվի հում նավթի, ինչպես նաեւ Ռուսաստանից անդամ երկրներ մատակարարվող նավթամթերքների վրա, բացառությամբ խողովակաշարով մատակարարվող հում նավթի»,- ասվում է վերջին նախագծում, որին ծանոթացել է Reuters-ը:
«Ուստի Եվրախորհուրդը կոչ է անում Խորհրդին վերջնական տեսքի բերել եւ անհապաղ ընդունել այն՝ ապահովելով արդար մրցակցություն եւ հավասար պայմաններ ԵՄ միասնական շուկայում, ինչպես նաեւ համերաշխություն անդամ երկրների միջեւ՝ մատակարարման հանկարծակի խափանումների դեպքում»,- ասվում է նախագծում։
Նշվում է, որ ԵՄ անդամ 27 երկրները «հնարավորինս արագ կորոշեն խողովակաշարով մատակարարվող հում նավթի ժամանակավոր բացառումը»։